«7-20-25» baǵdarlamasy boıynsha 87 myńnan astam ıpotekalyq nesıe berildi
ASTANA. KAZINFORM — 29 qazandaǵy jaǵdaı boıynsha Qazaqstanda «7-20-25» ıpotekalyq baǵdarlamasy aıasynda jalpy somasy 1,259 trln teńge bolatyn 87 327 nesıe berilgen. Bul týraly Ulttyq bank málim etti.
Retteýshi organnyń dereginshe, sońǵy bir aıda berilgen nesıe sany 476-ǵa, al jalpy somasy 10 mlrd teńgege artqan. Bıyl 1 qazanda baǵdarlama boıynsha 1,249 trln teńgege 86 851 nesıe rásimdelgen edi.
«7-20-25» baǵdarlamasy Qazaqstanda 2018 jyldan beri júzege asyrylyp keledi. Onyń maqsaty — azamattardyń baspana alýyna múmkindik jasaý. Baǵdarlama aıasynda turǵyn úıdi bastapqy naryqtan jyldyq 7 paıyzdyq mólsherlememen satyp alýǵa bolady. Ol úshin baspana qunynyń 20 paıyzy kóleminde bastapqy jarna tóleý qajet. Nesıe merzimi — 25 jylǵa deıin.
2025 jylǵy qazanda Ulttyq bank baǵdarlama boıynsha satyp alynatyn turǵyn úıdiń eń joǵary qunyn kóterdi. Astana, Almaty qalalary men olardyń mańyndaǵy eldi mekenderde, sondaı-aq Aqtaý, Atyraý jáne Shymkentte turǵyn úı qunynyń shekti mólsheri 30 mln teńgege deıin ulǵaıtyldy. Qaraǵandyda bul kórsetkish — 25 mln teńge, al basqa óńirlerde — 20 mln teńge bolyp belgilendi.
Budan bólek, qaryz alýshylarǵa tólem qabiletin rastaý úshin qosalqy qaryz alýshylarmen qatar kepilger tartýǵa da múmkindik berildi.
Ulttyq bank málimetinshe, baǵdarlama jyl saıyn bólinetin 100 mlrd teńgege deıingi qarajat sheginde qarjylandyrylyp keledi.
Aıta keteıik, búgin áıelderge arnalǵan «Umaı» ıpotekalyq baǵdarlamasynyń ekinshi kezeńine ótinim qabyldaý bastaldy.
Sondaı-aq «Naýryz» baǵdarlamasynda óńirlerge jeke lımıt engizilýi múmkin.
