«7-20-25» baǵdarlamasy aıasynda baspana satyp alýǵa arnalǵan shekteý ulǵaıtyldy
ASTANA. KAZINFORM - Qazaqstan Ulttyq banki «7-20-25» ıpotekalyq turǵyn úı kredıtteý Baǵdarlamasyn bekitý týraly» qaýlyǵa ózgertýler men tolyqtyrýlar engizilgenin habarlady.
Ózgertýler men tolyqtyrýlar Ulttyq banktiń 2025 jylǵy 26 qyrkúıektegi №59 Basqarma qaýlysymen (budan ári – qaýly) engiziledi, onda:
- Astana, Almaty qalalary jáne olardyń qala mańy aımaqtarynda, sondaı-aq Aqtaý, Atyraý, Shymkent qalalarynda satyp alynatyn baspananyń eń joǵary qunyn 25 mln teńgeden 30 mln teńgege deıin kóterý;
- Qaraǵandy qalasynda 20 mln teńgeden 25 mln teńgege deıin kóterý;
- basqa óńirlerden 15 mln teńgeden 20 mln teńgege deıin kóterý kózdeledi;
- qaryz alýshylarǵa tólem qabiletin rastaý úshin teń qaryz alýshyny (teń qaryz alýshylardy) ǵana emes, kepilgerdi de tartýǵa múmkindik beriledi.
Qaýlyǵa sáıkes, kredıttik ótinimdi qaraý kezinde qaryz alýshynyń kirisi toqtaýsyz júrgeni mańyzdy shart bolady.
Bul normalar turǵyn úıdiń qoljetimdi bolý múmkinderin keńeıtip, ıpotekalyq turǵyn úı qaryzdarynyń ıkemdiligi men qoljetimdiligin arttyrý úshin engizilip otyr.
Qaýlymen qamtylmaǵan ıpotekalyq turǵyn úı qaryzdarynyń parametrleri men Baǵdarlamanyń talaptary ózgerissiz qalady.
«7-20-25» baǵdarlamasy 2018 jyly iske qosyldy. Maqsat – 20%-dan bastalatyn bastapqy jarnasy bar jumys isteıtin azamattardy 25 jylǵa deıingi merzimge jyldyq 7% jeńildetilgen mólsherlemesimen qoljetimdi ıpotekamen qamtamasyz etý.
2025 jylǵy 2 qazandaǵy jaǵdaı boıynsha baǵdarlama aıasynda 1 149,7 mlrd teńgege 81 886 jeńildetilgen qaryz berildi.
-Qaýlynyń tolyq mátinimen QUB resmı ınternet-resýrsynda tanysýǵa bolady. Ózgertýler men tolyqtyrýlar qaýly qabyldanǵan kúnnen bastap kúshine enedi,-delingen habarlamada.
Osyǵan deıin Ulttyq banktiń qazan aıynda Ulttyq qordan 600–700 mln dollar satýdy josparlap otyrǵany týraly jazdyq.