«7-20-25» baǵdarlamasy aıasynda 76 106 qaryz berildi

ASTANA. KAZINFORM – Qyrkúıektegi jaǵdaı boıynsha, «7-20-25» baǵdarlamasyn iske asyrý aıasynda 1,049 trln teńgege 76 106 qaryz berildi. Bul týraly Qazaqstan Ulttyq bankiniń baspasóz qyzmeti málim etti. 

Ulttyq banktiń málimetinshe, Astana qalasy boıynsha 27 728 ótinish kelip tússe, 440,6 mlrd teńge bólingen. Al, Almaty qalasynda «7-20-25» baǵdarlamasy boıynsha 15 630 ótinim tússe, 245,6 mlrd teńge qarastyrylǵan. Shymkent qalasynda 5 636 ótinish bolsa, 71, 4 mlrd teńge bólinip otyr. 

«7-20-25» — Qazaqstan Respýblıkasynyń aýmaǵynda áreket etetin ıpotekalyq baǵdarlama ekenin eske salamyz. 

«7-20-25» — bul Qazaqstan Respýblıkasynyń azamattaryna arnalǵan áleýmettik baǵdarlama, ol árbir qazaqstandyq úshin qoljetimdi nesıe berý sharttarymen turǵyn úı jaǵdaılaryn jaqsartý úshin jańa múmkindikter beredi.

Qazaqstanda tuńǵysh ret baǵdarlamaǵa qatysýshynyń ózi tańdaı alatyn qurylys salýshylardyń tek bastapqy naryǵyna arnalǵan turǵyn úı baǵdarlamasy qabyldandy.

«Qazaqstannyń ornyqtylyq qory» AQ «7-20-25» baǵdarlamasynyń operatory bolyp tabylady.