«7-20-25»: Baǵdarlamaǵa qatysatyn bankterdiń sany segizge jetti

ASTANA. QazAqparat - Jeltoqsan aıynda Sberbanktiń qosylýymen «7-20-25» baǵdarlamasyna qatysýshy bankterdiń sany segizge jetti, dep habarlaıdy QazAqparat tilshisi.

«Bıylǵy jyly Elbasynyń «Bes áleýmettik bastamasynyń» birinshi bastamasyn iske asyrý boıynsha naqty sharalar atqaryldy. 4-shi shildede «7-20-25» ıpotekalyq baǵdarlamasy resmı túrde jumys isteı bastady. 2018 jyldyń qorytyndysy boıynsha quny 70 mlrd teńgeden astam 6 myńnan astam ótinish kelip túsken bolatyn. Sonyń ishinde quny 45 mlrd teńgelik 3700-ge taıaý ıpotekalyq nesıe maquldandy», - dep atap ótti «Baspana» Ipotekalyq uıymy» AQ basqarma tóraǵasy Qaırat Altynbekov OKQ-da ótken baspasóz máslıhaty barysynda.

Qaırat Altynbekovtyń aıtýyna qaraǵanda, qoldanysta bolǵan úılerge nesıe beretin «Baspana-hıt» baǵdarlamasy boıynsha da quny 1,7 mlrd teńgeniń ótinimi maquldandy.

«Qazirgi tańda «7-20-25» ıpotekalyq baǵdarlamasyna qatysýshy bankterdiń sany segizge jetti. Sońǵy ret jeltoqsan aıynda baǵdarlamaǵa Sberbank qosyldy. Osylaısha, «7-20-25» ıpotekalyq baǵdarlamasyna kelesi bankter qatysýda. Olar: Bank Tsentr Kredıt, ATF bank, Halyq banki, Tsesna bank, Eýrazııa banki, Bank RBK, Forte bank jáne Sberbank. Baǵdarlamany qarjylandyrý jaǵynan eshqandaı másele joq», - deıdi ol.