7-20-25: Astana men Almatyǵa jaqyn aımaqtarda ıpotekanyń shekti baǵasy kóterildi

  ASTANA. QazAqparat - QR Ulttyq bankiniń tóraǵasy Danııar Aqyshev «7-20-25» baǵdarlamasyn iske asyrý barysy týraly aıtyp berdi, dep xabarlaıdy QazAqparat.

Bas bankırdiń aıtýynsha, baǵdarlamaǵa birqatar ózgerister engizildi. Máselen, Shymkent respýblıkalyq mańyzy bar qala dárejesin alǵannan keıin ol jerde «7-20-25»-tiń shekti somasy 25 mln teńgege deıin kóterildi. Budan bólek, Astana men Almaty qalalaryna jaqyn aımaqtarda ıpotekanyń somasy týra solaı joǵarylady.

«Biraq baǵdarlama azamattarymyzdyń masyldyǵyn jasamaýy tıis. Baǵdarlama stavkasy tómen, al kredıt berý merzimi uzaq, áleýmettik baǵyttaǵy baǵdarlama bolyp tabylady. Biraq ol ıpoteka bolyp qala beredi. Bul kredıtti tóleý úshin resmı rastalǵan kiris bolý kerek degendi bildiredi. Mysaly, quny 10 mıllıon teńgeniń páterin satyp alý úshin 2 mıllıon teńge mólsherinde bastapqy jarna qajet. Aı saıynǵy tólem 57 myń teńge bolady. Tıisinshe, banktiń maqyldaýyn alý úshin azamattyń aı saıynǵy kirisi, shamamen, 120 myń teńge bolýǵa tıis. Sebebi «kredıt boıynsha borysh kólemi kiristiń jartysynan aspaýy tıis»degen ereje bar. Sondyqtan xalyqtyń tólem jasaýǵa qabiletti bolýy baǵdarlamanyń sátti iske asyrylý faktorlarynyń biri bolyp tabylady», - dedi D.Aqyshev Úkimettiń búgingi otyrysynda.

Aıta keteıik, búgin Mınıstrler kabıneti Prezıdenttiń bes áleýmettik bastamasyn iske asyrý barysyn qarady. Sonyń aıasynda QR Bilim jáne ǵylym mınıstri Erlan Saǵadıev ulttyq biryńǵaı testileýge qatysty ózgeristerdi jarııalady. Al Úkimet basshysy Baqytjan Saǵyntaev stýdenttik jataqxanalardyń qurylysyn uzaqqa sozbaýdy tapsyrdy.