«7-20-25»: Aqtóbede memlekettik baǵdarlamamen úı alǵandar qatary kún sanyp artyp keledi
AQTÓBE. QazAqparat - Aqtóbede «7-20-25» memlekettik baǵdarlamasy aıasynda 60-tan astam ótinish maquldandy. Bankterge keńes alýǵa barǵan adamdar sany kún sanap artyp keledi, dep habarlaıdy QazAqparat tilshisi.
«7-20-25» baǵdarlamasy boıynsha keńes alýshylar kóp. Qazir Aqtóbe oblysy boıynsha eki bank júıeli jumys istep, aldyna kelgen klıentterdiń ótinishin tekserip jatyr.
«Aqtóbe oblysy boıynsha 64 ótinish maquldanyp, qujat rásimdeldi. Taǵy ondaǵan ótinish túsip, qujattary tekserilip jatyr. Óńir Qazaqstan boıynsha Almaty, Astana, Aqtaý qalalarynan keıingi tórtinshi orynda kele jatyr. Bul kórsetkish aldaǵy ýaqytta ózgerip, adamdardyń páter alýyna barlyq jaǵdaı jasalady»,- dedi QR Ulttyq bankiniń Aqtóbe oblystyq fılıal dırektorynyń orynbasary Danat Seıilov.
Qazirgi kúni páter alýǵa ótinish bergen aqtóbelikterdiń bir tabysy nesıe alýǵa jetpeı, otbasyndaǵy ekinshi adamnyń eńbekaqysy eseptelip jatyr. Shamamen ótinish bergenderdiń 80 paıyzy eki adamnyń eńbekaqy týraly anyqtamasyn usyndy. Ári kepil bolatyn adamdardy da nesıe alý kezinde qosýǵa bolady.
«Bank 60-qa jýyq ótinishti maquldap, nesıe berdi. Qazir taǵy 20 ótinish qaralyp jatyr. Aqtóbelikter páterdiń kóbin jańa salynyp jatqan Batys-2 yqsham aýdanynan tańdady. Buryn nesıe alyp, ony ýaqytyly ótemegen adamdardyń ótinishi muqııat qaralady. Bir aı tólemese, sebebin bilip, anyqtama suralady. Al eger kelisimshartty buzyp, jyldar boıy maqsatty túrde ótemese, birden qujattaryn keri qaıtaramyz»,- dedi «Bank Tsentr Kredıt» AQ fılıal dırektory Ásel Shúnkeeva.
