7-20-25: Aqtóbe oblysynda ıpotekanyń 10 protsenti jergilikti bıýdjetten tólenedi

ASTANA. QazAqparat - Aqtóbe oblysynyń ákimi Berdibek Saparbaev "7-20-25" baǵdarlamasy aıasynda qaı sanattaǵy azamattarǵa 10 protsenttik jeńildiktiń beriletinin aıtty, dep xabarlaıdy QazAqparat tilshisi.

Oblys basshysynyń aıtýynsha, osy ýaqytqa deıin óńirde jańa baǵdarlamamen páter alǵandardyń sany 153 adamǵa jetti. Olardyń barlyǵy 1,3 mlrd teńgeniń ıpotekasyn aldy. "Biz qazir, ásirese jastarǵa, memlekettik qyzmetkerlerge, kóp balaly otbasylarǵa kómektesý úshin 20 protsenttiń 10 protsentin ózimizdiń jergilikti bıýdjetten tóleıtin bolyp sheshtik. Búginde Aqtóbede sol arqyly kóptegen jastar páter alyp jatyr. Biz ony qazir baspasóz arqyly túsindirip jatyrmyz. Bizdiń oıymyzsha, osylaı ary qaraı júretin bolsa, osy baǵdarlama boıynsha páteri joq aqtóbelikterdiń kóbisi baspanaly bolady", - dedi B.Saparbaev Astanada ótken baspasóz máslıxatynda.

Aıta keteıik, osy brıfıngte Berdibek Mashbekuly tanymal ánshi Dımash Qudaıbergenniń Aqtóbede úlken kontsertti ótkizetinin jetkizdi. Sondaı-aq, jumysshylardyń jalaqysyn qalaı kóteretinin aıtyp berdi. Samat Smaqovtyń "Aqtóbe" fýtbol klýbyn qalaı satyp alǵany da sóz boldy.