69,8 myń qazaqstandyq memleket qoldaýymen jumysqa ornalasty
ASTANA.KAZINFORM — Bıylǵy 1 maýsymdaǵy jaǵdaı boıynsha sýbsıdııalanatyn jumys oryndaryna 69,8 myńǵa jýyq adam ornalastyryldy. Bul týraly Eńbek jáne halyqty áleýmettik qorǵaý mınıstrligi málim etti.
Sýbsıdııalanatyn jumys oryndary jumys berýshilermen eńbek mobıldiligi ortalyqtarynyń (mansap ortalyqtary) arasyndaǵy sharttyq negizde qurylady jáne jumyssyzdardy, sondaı-aq jumys izdeý kezinde qosymsha qoldaýdy qajet etetin halyqtyń jekelegen sanattaryn jumysqa ornalastyrýǵa arnalǵan.
Qazirgi ýaqytta sýbsıdııalanatyn jumyspen qamtýdyń tórt negizgi baǵyty iske asyrylýda: qoǵamdyq jumystar, áleýmettik jumys oryndary, jastar tájirıbesi jáne «Kúmis jas» jobasy.
— Qoǵamdyq jumystar eń suranysqa ıe baǵyt bolyp qala beredi. Bul baǵyt jumyssyzdardy, stýdentter men jalpy bilim beretin mektepterdiń joǵary synyp oqýshylaryn oqýdan bos ýaqytynda ýaqytsha jumyspen qamtýǵa múmkindik beredi. Qoǵamdyq jumystardyń ereksheligi — olardyń óńirler úshin áleýmettik, ekonomıkalyq jáne ekologııalyq mańyzdylyǵynda. Osy jyldyń 1 maýsymyndaǵy jaǵdaıǵa sáıkes qoǵamdyq jumystarǵa 49,6 myń adam tartyldy. Qatysýshylardyń eńbekaqysy 24 AEK-ten kem emes, ıaǵnı 103,8 myń teńgeni quraıdy, — delingen habarlamada.
Áleýmettik jumys oryndary jumyssyz azamattardy jumysqa ornalastyrý úshin memleket esebinen jalaqyny ishinara sýbsıdııalaý arqyly jumys berýshilermen qurylady. Sýbsıdııanyń aı saıynǵy mólsheri belgilengen jalaqynyń 35%-yn, biraq 103,8 myń teńgeden aspaıtyn mólsherdi quraıdy. Búgingi tańda áleýmettik jumys oryndaryna 8,2 myń adam ornalastyryldy.
— Jastardy jumyspen qamtý baǵytynda tehnıkalyq jáne kásiptik, orta bilimnen keıingi, joǵary jáne joǵary oqý ornynan keıingi bilim berý uıymdarynyń túlekteri úshin «Jastar tájirıbesi» baǵdarlamasy iske asyrylýda. Ol jas mamandarǵa mamandyǵy boıynsha alǵashqy kásibı tájirıbe jınaqtaýǵa jáne eńbek naryǵyndaǵy básekege qabilettiligin arttyrýǵa múmkindik beredi. Qatysý merzimi 12 aıǵa deıin, al eńbekaqy mólsheri 30 AEK-ke deıin, ıaǵnı 129,8 myń teńgege deıin jetedi. Jyl basynan beri jastar tájirıbesiniń qatysýshylary 4,9 myń adamdy qurady, — dep habarlady vedomstvodan.
Egde jastaǵy azamattar úshin «Kúmis jas» jobasy tabysty iske asyrylýda. Onyń negizgi maqsaty — 50 jastan asqan jumyssyz azamattardy jumyspen qamtýǵa járdemdesý jáne olardy keıinnen turaqty jumysqa ornalastyrý úshin jaǵdaı jasaý. Memleket jobaǵa qatysýshylardyń jalaqysyn úsh jyl boıy sýbsıdııalaıdy, bul rette jumys berýshilerge eńbekaqy shyǵyndarynyń 60%-dan 70%-ǵa deıingi bóligi óteledi. 1 maýsymdaǵy jaǵdaı boıynsha joba aıasynda 7,1 myń adam jumysqa ornalastyryldy.
Sýbsıdııalanatyn jumys oryndaryn iske asyrý halyqty jumyspen qamtýdy arttyrýǵa, jańa kásibı daǵdylardy ıgerýge jáne azamattar úshin turaqty tabys kózin qamtamasyz etýge yqpal etedi. Bul baǵyttaǵy jumystar nátıjeli jumyspen qamtýǵa járdemdesý jáne eńbek naryǵyn damytý jónindegi memlekettik saıasat aıasynda jalǵastyrylatyn bolady.
Buǵan deıin jumyssyz azamattarǵa 6 aıǵa deıin tegin kásiptik oqý usynylatynyn jazdyq.
