69 jastaǵy ıakýtııalyq múgedek marafonshy jer sharyn aınalyp júgirýge bel býdy
ASTANA. QazAqparat - ıAkýtııalyq marafonshy jalpy uzyndyǵy 20 myń shaqyrymnan asatyn marafondy josparlaýda. Kóz múgedegi Petr Naýmov jaqynda 69 jasqa tolady.
Ol óz marafonyn Rıo-de-Janeırodaǵy Olımpıada oıyndaryna jáne 6 shildede ıAkýtııada ashylǵan «Azııa balalary» halyqaralyq sport oıyndaryna arnaıdy, dep habarlady TASS.
Alty aıǵa sozylýy múmkin bul jańa marafondy Naýmov áıeli Nınamen birge atqarmaq. «Nına velosıpedpen júredi, al men júgirip shyǵamyn», deıdi marafonshy.
Jospar boıynsha, Vladıvostoktan shyqqan erli-zaıyptylar Sıel qalasyna (AQSh) ushyp baryp, Nıý-Iorkke deıin júgirýdi bastaıdy. Nıý-Iorktan keıin ıakýtııalyq jup Amsterdamǵa ushaqpen jetip, Nıderlandy astanasynan Kalınıngradqa deıin júgiretin bolady.
Burynyraq Reseı teatr jáne kıno juldyzdary - Dmıtrıı Merzlıkın, Pavel Derevıanko, Amadý Mamadakov, Anna Chýrına, Aleksandr Robak jáne basqalary ıakýtııalyq sportshyny qarjylaı qoldaýǵa atsalysqan bolatyn.
AQSh aýmaǵynyń bir jaǵalaýynan ekinshi jaǵalaýyna júgiretin "Forrest Gamp" fılminde basty róldi somdaǵan gollıvýdtyq akter Tom Henks te Naýmovqa qoldaý bildirdi.
