69 kásiporyn 2,5 myńǵa jýyq jumyskerdiń jalaqysyn tólemegen

NUR-SULTAN. QazAqparat - 2020 jyldyń qańtarynda Qazaqstanda memlekettik eńbek ınspektorlary 1,1 myńnan astam jumyskerdiń quqyǵyn qorǵady, dep habarlaıdy QazAqparat.

QR Eńbek jáne halyqty áleýmettik qorǵaý mınıstrliginiń málimetine sáıkes, bıylǵy jyldyń alǵashqy aıynda memlekettik eńbek ınspektorlary elimizdegi 69 kásiporynda 2,3 myń jumysker aldynda jalaqy boıynsha 342 mln teńgeden asa qaryz bar ekenin anyqtady.

«Atalǵan kásiporyndardyń basshylaryna oryndalýǵa mindetti 33 nusqama berilip, 4 mln teńgeden astam somaǵa aıyppul salyndy. Qoldanylǵan sharalardyń nátıjesinde, sonymen qatar jalaqy boıynsha qaryzdy óteýdiń merzimi men kestesin qatań belgileý arqyly 1,1 myńnan astam jumyskerdiń quqyǵy qorǵalyp, nátıjesinde olarǵa 331 mln teńge tólendi», - dedi mınıstrlikten.

Jalpy, qańtar aıynda memlekettik eńbek ınspektorlary 442 tekserý júrgizgen. QR eńbek zańnamasyn buzýdyń 866 faktisi anyqtaldy.