68 aýyldyń turǵyndary ózen sýyn ishýge májbúr

Bul týraly búgin QR Parlamenti Májilisinde ótken parlamenttik tyńdaýda QR Densaýlyq saqtaý vıtse-mınıstri Alekseı Tsoı aıtty, dep habarlaıdy QazAqparat.

«Qolda bar pozıtıvti nátıjelerge qaramastan  adam densaýlyǵyna teris áser etetin birqatar problema bar. Máselen, Ońtústik Qazaqstan, Jambyl, Batys Qazaqstan jáne Almaty oblystarynyń 68 eldi mekeni bulaqtar men shaǵyn ózenderden tazartylmaǵan sýdy aýyz sý retinde paıdalanýǵa májbúr. OQO, Qaraǵandy, Aqmola oblystarynyń keıbir eldi mekenderindegi sý daıyndaý qurylǵylary 20 jyldan astam ýaqyt boıy kúrdeli jóndeý kórmegen. Nátıjesinde olarda sýdy tazartý tıimdiligi óte tómen. Aýyz sý sapasy talap etiletin parametrlerge jetpeıdi», - dedi vıtse-mınıstr.

Onyń aıtýynsha, lastanǵan sýdy paıdalaný jiti ınfektsııalyq aýrýlardyń týyndaýyna sebepker bolýy múmkin. Sonymen qatar adamnyń negizgi ómirlik qyzmet fnktsııalaryna da áserin tıgizedi.

«Aýyldyq eldi mekenderde ákimdikter janynda sýmen jabdyqtaý nysandaryna qyzmet kórsetýge arnalǵan jáne barlyq deńgeılerde óndiristik zerthanalyq baqylaýdy júzege asyratyn uıymdar qurý jónindegi mınıstrliktiń usynystary «Aq bulaq» baǵdarlamasyna engizilgen bolatyn. Biraq, sýmen jabdyqtaý nysandaryn balansqa qabyldaý jáne keıin olarǵa qyzymet kórsetý máselesi is júzinde barlyq aımaqta ózekti bolyp qalýda»,-  dedi ol.

Onyń sózine qaraǵanda, búgingi kúni 120-dan astam sý qubyry men 600-den astam ortalyqtandyrylmaǵan sýmen jabdyqtaý kózi vedomstvolyq qajettiliktermen qamtamasyz etilmegen. 140-tan astam sý qubyry óndiristik baqylaýmen qamtylmaǵan.

Aıta keteıik, QR Parlamenti Májilisinde elimizdiń eldi mekenderin sapaly aýyz sýmen qamtamasyz etýdiń ózekti máselelerine arnalǵan parlamenttik tyńdaý ótti. Sharaǵa Májilis Tóraǵasy Nurlan Nyǵmatýlın, QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov, Qarjy mınıstri Baqyt Sultanov, Investıtsııalar jáne damý mınısti Jeńis Qasymbek, múddeli memlekettik organdardyń, ǵylymı-zertteý ınstıtýttarynyń ókilderi qatysty.