672 mln teńge aıyppul kimge salyndy

NUR-SULTAN. QazAqparat - Sońǵy 2,5 jylda 1 096 para alýshy sot úkimimen jalpy somasy 8,6 mlrd teńge aıyppulǵa sottaldy. Bul týraly QR Sybaılas jemqorlyqqa qarsy is-qımyl agenttigi Strategııa jáne jedel basqarý departamentiniń basshysy Nurlan Jaqsymbetov aıtty, dep habarlaıdy QazAqparat tilshisi.

Onyń atap ótýinshe, sybaılas jemqorlyqqa qarsy is-qımyldyń monetarlyq tıimdiliginiń taǵy bir túri - para alǵany jáne bergeni úshin eselengen aıyppul ınstıtýty. Aıyppul mólsheri para kóleminiń 10 esesinen bastap 80 esesine deıingi aralyqta bolady. 2018-2019 jyldary jáne 2020 jyldyń birinshi jartyjyldyǵynda 1096 para alýshy sot úkimimen jalpy somasy 8,6 mlrd teńge aıyppulǵa sottaldy.

«Aıyppuldyń ortasha mólsheri 8 mln teńgeni qurady. Ulttyq ekonomıka eks-mınıstriniń isimen para berý faktileri boıynsha Esmuqanov pen Smaǵulov osy kezeńdegi eń joǵary aıyppul 672 mln teńgege sottaldy. Sot 2020 jyly eń iri aıyppul – 411 mln teńgeni Mádenıet jáne sport mınıstrliginiń burynǵy jaýapty hatshysy Ýálıevke saldy», - dedi Nurlan Jaqsymbetov.