67 jastaǵy marokkolyq mototsıklmen birneshe eldi basyp ótip, Qyzylordaǵa jetti
QYZYLORDA. KAZINFORM – 22 mamyrda Marrakesh-Almaty mototsıkl týrymen jolǵa shyqqan marokkolyq kásipker jáne saıahatshy Ábýfırass Ábdilǵanı 11 maýsym kúni Qyzylorda qalasyna aıaldady. Kazinform tilshisi jıhankezben jolyǵyp, sóılesti.
Goldwig markaly mototsıklimen ol Eýropanyń birneshe elin, Túrkııa, Grýzııa jáne Ázerbaıjandy kesip ótken. Kaspıı teńizi arqyly Qazaqstanǵa jetip, Aqtaý, Aqtóbe, Aral qalalarynda boldy.
Ár eldiń, ár halyqtyń óz ereksheligi baryn aıtqan keıipkerimiz qazaqtyń qonaqjaılyǵyna tánti.
- Qazaq ashyq-jarqyn, qıyndyqta qalǵan adamǵa kómektesýge umtylatyn, qolda baryn bólisýden aıanyp qalmaıtyn halyq eken. Óz basym mundaı qasıetti, mysaly, eýropalyqtardyń boıynan baıqamadym, - dedi Ábýfırass Ábdilǵanı.
Aralǵa barar jolda eki aıaqty kóligi buzylyp qalǵan. Sol kezde jerlesterimiz tanymasa da ózine kómektesip, dalada qaldyrmaǵanyna dán rıza.
- Mototsıkl meniń joldaǵy serigim, dosym desem de artyq aıtqanym emes. Tehnıka bolǵasyn aıaqasty buzylyp qalatyn sátter kezdesedi. Biraq qudaı meni eshqashan jalǵyz qaldyryp kórgen joq. Baılanys ustamaıtyn jerde de sátin salyp, kómektesetin adamdardy jolyqtyrady. Keıbirimen keıin jaqsy aralasyp, dos bolyp kettik, - dedi velosaıahatshy.
67 jastaǵy jıhankezdiń 10-nan astam kóligi bar. Sonyń 4-in kezektesip paıdalanyp júr. Qalǵany isten shyqsa da saqtap qoıǵan. Óıtkeni mototsıklmen baılanysty árbir estelik qymbat. Sheteldik jıhankez osyǵan deıin álemniń 60-tan astam elin aralaǵan. Bıyl tórtinshi ret saıahatqa shyǵyp otyr.
Marakkesh-Almaty týrynda shamamen 10 myń shaqyrym joldy artta qaldyrypty. 23 kúni jolda, mototsıkl ústinde ótken. Budan keıin Túrkistanǵa aıaldap, Taraz arqyly Almatyǵa jetýdi josparlap otyr.
- Úlken saıahatqa jalǵyz shyqqandy jaqsy kóremin. Óıtkeni ózińmen óziń bolasyń, saǵan eshkim kedergi keltirmeıdi, óz tártibińdi óziń qurasyń, - dedi Ábýfırass Ábdilǵanı.
Keıipkerimiz árbir saparyn taspalap otyrady. Qazaqstandaǵy sapary boıynsha da beınefılm túsirip, elimizdi Marokkoda jáne álemde tanymal etýge úles qosqysy keledi. Sondaı-aq eki elde týrızmdi damytyp, ózara baılanysty odan ári damytýǵa yntaly.
Buǵan deıin biz ózbekstandyq opera ánshisi, velosıpedshi jáne sport ardageri Hýrsand Sherov uıymdastyrǵan biregeı velomarafon 10 naýryz kúni Tashkentten bastalyp, Qyzylordaǵa toqtaǵanyn jazǵan edik.