664 myńnan astam qazaqstandyq statsıonar tańdaý quqyǵyn paıdalandy
ASTANA. 11 qańtar. QazAqparat - Qazaqstanda naýqastardyń dárigerdi jáne medıtsınalyq mekemeni erkin tańdaý quqyǵyn qamtamasyz etýge baǵyttalǵan Biryńǵaı ulttyq densaýlyq saqtaý júıesi engizilýde,
dep habarlady pm.kz saıty.
«Bastapqy medıtsına-sanıtarlyq kómektiń sapasyn arttyra túsetin Biryńǵaı ulttyq densaýlyq saqtaý júıesi 2013 jylǵa qaraı jasaqtalady», - dedi Elbasy Nursultan Nazarbaev «Nur Otan» partııasynyń XIII sezinde sóılegen sózinde.
Sapaly medıtsınalyq qyzmetke qoljetimdilikti qalyptastyrý jáne jer-jerlerde joǵary mamandandyrylǵan medıtsınalyq kómekti damytý maqsatynda memleket óńirlerdegi densaýlyq saqtaý salasyn qarjylandyrý kórsetkishin jyl saıyn eselep keledi.
«Densaýlyq saqtaý salasyn damytýdyń 2015 jylǵa deıingi memlekettik baǵdarlamasy basqarýdy jaqsartý, bıýdjet qarjysyn tıimdi paıdalanýdy jetildirý, dári-dármekterge degen qoljetimdilikti keńeıtý jáne olardyń sapasyn arttyrý, sondaı-aq profılaktıkalyq sharalardy kúsheıtý sharalarynyń esebinen Biryńǵaı ulttyq densaýlyq saqtaý júıesin nyǵaıtýǵa baǵyttalyp otyr», - dedi Premer-Mınıstr Kárim Másimov «Nur Otan» HDP parlamenttik fraktsııasynyń otyrysynda sóılegen sózinde.
Densaýlyq saqtaý mınıstrliginiń aqparaty boıynsha, 2011 jylǵy 11 aıdyń qorytyndysy boıynsha josparǵa sáıkes statsıonarlarda em qabyldaǵan 664 myń adam statsıonar tańdaý quqyǵyn paıdalandy, onyń ishinde aýyl azamattarynyń úlesi 45,5 paıyzdy quraǵan.
Jańa tehnologııalardy, zamanaýı dıagnostıka jáne emdeý ádisterin engizý arqyly óńirlerde básekege qabiletti medıtsınany damytý aımaqtyq densaýlyq saqtaý uıymdaryna barýshylardyń joǵary paıyzyn qamtamasyz etip otyr. Atap aıtqanda, óz óńirlerinde em qabyldaǵan azamattar 95,3 paıyzdy qurasa, óz óńirlerinen basqa aımaqtarǵa baryp emdelgen halyq úlesi 4,7 paıyz. Halyqtyń 13,2 paıyzy respýblıkalyq klınıkalardy arnaıy kómekke ıe bolsa, onyń 30 paıyzyn aýyl azamattary quraıdy.
Oǵan qosa, Biryńǵaı ulttyq densaýlyq saqtaý júıesin engizile bastaǵaly beri elimizde kerýet-oryndarynyń qory qaıta qurylymdaý jáne olardyń paıdalaný tıimdiligin arttyrýdyń esebinen 2010 jylǵy 104 myńnan 102 myń birlikke azaıyp, orynmen qamtamasyz etý kórsetkishi 10 myń adamǵa shaqqanda sáıkesinshe 62,5 jáne 64,5 qurady. 2011 jyly elimizdiń emhanalarynda 2 018,3 myń naýqas em qabyldady.
Taǵy bir aıtatyn másele, bastapqy densaýlyq saqtaý salasy jumystarynyń tıimdiligin arttyrý úshin 2011 jyldan bastap bastapqy medıtsına-sanıtarlyq kómek kórsetý uıymdarynda áleýmettik qyzmetkerlerdiń, psıhologtardyń, ýchaskelik terapevterge arnalǵan ekinshi medbıkeler men jalpy tájirıbedegi dárigerlerge arnalǵan úshinshi medbıkelerdiń laýazymdary engizildi. Jastary 60-tan asqan qarııalarǵa úı jaǵdaıynda em jasaý kórsetkishi 2010 jylǵy deńgeıden 2,4 esege artty.
Biryńǵaı ulttyq densaýlyq saqtaý júıesiniń patsıentke baǵyttylyǵy densaýlyq saqtaý salasyndaǵy básekelestikti damytady jáne medıtsınalyq qyzmetterdi jańa sapalyq deńgeıdegi shyǵarýǵa múmkindik beredi.
