66 jastaǵy ózbekstandyq velosaıahatshy halyqaralyq velomarafon aıasynda Qyzylordaǵa aıaldady
QYZYLORDA. KAZINFORM – Ózbekstandyq opera ánshisi, velosıpedshi jáne sport ardageri Hýrsand Sherov uıymdastyrǵan biregeı velomarafon 10 naýryz kúni Tashkentten bastalǵan bolatyn.

Oǵan qatysýshylar búgin Qyzylordaǵa taban tiredi. Oblys ortalyǵynda ornalasqan Mánshúk Mámetova atyndaǵy pedagogıkalyq joǵary kolledjine baryp, kolledj ujymymen kezdesti.

– Іs-shara barysynda ekinshi dúnıejúzilik soǵys batyry Mánshúk Mámetovanyń eskertkishine gúl shoqtary qoıyldy. Qaharman qazaq qyzynyń janqııarlyq erligin umyt qaldyrmaý týraly ónegeli áńgime órbidi. Hýrsand Sherovke qyzylordalyqtar atynan velosporttan ulttyq quramanyń jeıdesi tabystaldy, – dep habarlady oblystyq dene shynyqtyrý, sport jáne týrızm basqarmasynan.

Aıta keteıik, 66 jastaǵy sportshy bul sharany Jeńistiń 80 jyldyǵyna arnap otyr. Ol osylaısha Ortalyq Azııa halyqtarynyń ortaq iske qosqan úlesin kórsetkisi keledi. Marafon baǵyty Qazaqstan aýmaǵy arqyly ótedi jáne 2025 jylǵy 9 mamyrda Máskeýde aıaqtalady.
Jyl basynda biz Jeńistiń 80 jyldyǵyn toılaýdyń birlesken is-sharalar jospary bekitiletinin jazǵanbyz.