66 ret jol erejesin buzǵan qyzylordalyqqa 2 mln teńgeden astam aıyppul salyndy
QYZYLORDA. KAZINFORM — 1-14 jeltoqsan aralyǵynda Qyzylorda oblysynda «Qaýipti júrgizýshi» jedel profılaktıkalyq is-sharasy ótti.
Oblystyq polıtsııa departamentiniń málimetinshe, osy ýaqyt aralyǵynda barlyǵy 2951 quqyqbuzýshylyq anyqtalǵan.
— Jalǵan memlekettik tirkeý nómir belgileri bar kólik quralyn basqarýdyń 6, kólik basqarý kezinde baılanys quraldaryn paıdalanýdyń 286, qarsy baǵytqa shyǵýdyń 13, baǵdarshamnyń tyıym salatyn belgisine ótýdiń 69 deregi tirkeldi. Al 252 jaǵdaıda kólik júrgizýshisi jaıaý júrginshige jol bermegen, 52 jaǵdaıda masań kúıde rýl tizgindegen, 120 adam basqarý quqyǵy joq bolsa da kólik júrgizgen. Kólik quralyn basqarý quqyǵynan aıyrylǵan 17 adamnyń qaıtadan temir tulpar tizgindegeni anyqtaldy, — dedi departamenttiń ákimshilik polıtsııa basqarmasynyń aǵa ınspektory Ǵanı Abdýllauly.
Іs-shara aıasynda 66 ret quqyq buzyp, 2 mln 162 myń teńge aıyppul arqalaǵan turǵyn ustaldy.
— Onyń zańnan tys áreketteri jyl kóleminde quqyqbuzýshylyqty avtomatty túrde anyqtaıtyn qurylǵylarǵa túsken. Barlyǵynda jyldamdyqty shekten asyrǵan. Aıyppul salynǵany jóninde der kezinde habarlanǵan, — dedi departament ókili.
Buǵan deıin biz qyzylordalyq júrgizýshiniń 20 jylda birde-bir ret jol erejesin buzbaǵanyn jazǵanbyz.
