6,5 mln teńgege deıingi salyq bereshegin kepildiksiz bólip tóleýge ruqsat beriledi

ASTANA. KAZINFORM — Qarjy mınıstri Mádı Takıev Úkimet otyrysynda salyq beresheginiń shekti somasyn nege kótergenderin aıtty. 

— Jańa Salyq kodeksinde 1,5 myń aılyq eseptik kórsetkishke (shamamen 6,5 mln teńge) deıin bereshegi bar salyq tóleýshilerge kepilge múlik qoımastan jáne bankten kepildik almastan 1 jylǵa keıin qaldyrý arqyly bólip tóleý múmkindigi beriledi.

Bul bıýrokratııany azaıtyp, kepildi baǵalaý men saqtandyrý shyǵyndaryn joıady, bólip tóleýdi resimdeý merzimderin qysqartady.

Kóldeneń monıtorıngke qatysýshylarǵa da 12 aıǵa deıin kepilsiz jáne kepildiksiz bólip tóleý múmkindigi beriledi, — dedi vedomstvo basshysy.

Al óndirýshiler men daıyn ónimge arnalǵan taýar ımporttaýshylar qosylǵan qun salyǵyn bir jylǵa deıin keıinge qaldyra alady.

— Salyq tóleýshilerge qolaıly bolý úshin Qarjy mınıstrliginiń saıtynda jańa Salyq kodeksi boıynsha ózekti «Top-100 suraq-jaýap» aıdary ashylǵan, — dedi Mádı Takıev.

Aıta keteıik, búgingi Úkimet otyrysynda mıkro jáne shaǵyn bıznesti qoldaý sharalaryn talqylanyp jatyr.