650 myńnan astam ata-ana elimizdegi pedagogıkalyq qoldaý ortalyqtarynda oqýdan ótti
ASTANA. KAZINFORM – 2026 jyldyń basynan beri ata-analardy pedagogıkalyq qoldaý ortalyqtarynda jańartylǵan 3.0 baǵdarlamasy boıynsha 86 myńnan astam sabaq ótkizildi. Oqytý 650 myńnan astam ata-anany qamtyp, bala tárbıesi, psıhologııalyq qaýipsizdigin qamtamasyz etý, mektep pen otbasynyń ózara is-qımylyn nyǵaıtýǵa baǵyttaldy. Bul týraly Oqý-aǵartý mınıstrligi habarlady.
Sabaqtardyń mazmuny pedagogter men ata-analar qaýymdastyǵynyń usynystaryn eskere otyryp jyl saıyn jańartylyp otyrady. Baǵdarlamaǵa tájirıbege baǵyttalǵan taqyryptar men ákelerdiń qatysýymen ótetin mektep is-sharalary engizilgen. Bul otbasynyń bala tárbıesindegi rólin kúsheıtip, senimdi qarym-qatynas qalyptastyrýǵa yqpal etedi.
Jańartylǵan 3.0 baǵdarlamasy baǵdarlamasy úsh baǵytty qamtıdy: ata-analardyń emotsııalyq turaqtylyǵy men óz-ózine degen senimdiligin damytý, bala úshin qaýipsiz orta qalyptastyrý, sondaı-aq erekshe bilim berý qajettilikteri bar balalardy tárbıelep otyrǵan otbasylarǵa pedagogıkalyq qoldaý kórsetý. Mundaı tásil balalardyń jas, psıhologııalyq jáne áleýmettik erekshelikterin eskerip, otbasylarmen júıeli jumys júrgizýge múmkindik beredi.
Sabaqtardy arnaıy daıyndyqtan ótken pedagogter men psıhologter júrgizedi. Ata-analar senimdi qarym-qatynas ornatý, táýekelderdiń aldyn alý, bala men ata-ana arasyndaǵy emotsııalyq baılanysty nyǵaıtý boıynsha túrli keńester alady. Ata- anadar arasynda eń úlken qyzyǵýshylyqqa ıe baǵyttar- eresekterdiń jeke úlgisi men balalardyń qaýipsizdigin qamtamasyz etýge qatysty taqyryptar.
Saýalnama nátıjeleri boıynsha ata-analardyń kópshiliginiń tárbıege erekshe mán bere bastaǵany baıqalady:
- ata-analardyń 73,9%-y balalarymen kún saıyn sóılesedi;
- 89,6%-y balanyń qıyndyqtaryna jedel áreket etedi;
- 78%-y balasynyń aralasatyn ortasyn jaqsy biledi;
- árbir ekinshi ata-ana tárbıeleý tásilderin qaıta qaraýǵa daıyn;
- 62%-y alǵan bilimderin kúndelikti tájirıbede qoldanýdy josparlaıdy.
Eske sala keteıik, ata-analardy pedagogıkalyq qoldaý ortalyqtary 2023 jyldan bastap «Adal Azamat» biryńǵaı tárbıe baǵdarlamasy aıasynda elimizdiń barlyq mektepterinde jumys isteıdi jáne mektep pen otbasy arasyndaǵy ashyq dıalogtyń tıimdi alańyna aınalyp, ata-analardy bala tárbıeleý men damytýǵa arnalǵan praktıkalyq quraldarmen qamtamasyz etip keledi.
Eske salsaq, buǵan deıin Qazaqstanda ata-analyq mindetterin oryndamaıtyn 11 myńnan astam otbasy bar ekenin habarlaǵan edik.