650 adamnyń ómirin jalmaǵan apat: Grekııada 17 jaǵalaý kúzetshisine aıyp taǵyldy

ASTANA. KAZINFORM — Grekııanyń Áskerı-teńiz soty 2023 jyly mıgranttar mingen kemeniń apatqa ushyraýyna baılanysty jaǵalaý kúzetiniń 17 qyzmetkerine aıyp taqty. Bul apat sońǵy on jyldaǵy Jerorta teńizindegi eń kóp adam shyǵynyna ákelgen kóshi-qon apaty bolyp otyr, dep jazdy BBC.

2023 jyldyń 14 maýsymyna qaraǵan túninde «Adrıana» atty balyq aýlaý kemesi mıgranttardy tasymaldap kele jatyp, Grekııa jaǵalaýyndaǵy Pılos mańynda sýǵa batyp ketti. Keıbir derekter boıynsha, apat kezinde shamamen 650 adam qaza tapqan bolýy múmkin.

Apattan aman qalǵandar BBC-ge bergen suhbattarynda grek jaǵalaý kúzetiniń qyzmetkerleri olardyń qaıyǵyn súırep aparýǵa tyrysqan sátte aýdaryp jibergenin, sodan keıin kýágerlerge bolǵan jaıtty jasyrýǵa qysym kórsetkenin aıtqan.

— Bizge kýálik etip, aıyp taǵý úshin eki jyl qajet boldy, biraq sonsha adam bul oqıǵanyń kýási boldy, — deıdi tiri qalǵandardyń biri, Ahmad (aty ózgertilgen), Sırııa azamaty.

Eske sala keteıik, buǵan deıin Sıtsılııa jaǵalaýyndaǵy keme apaty bolyp, brıtanııalyq kásipker Maıkl Lınch iz-tússiz joǵalǵanyn jazǵan edik.