65 jyldyq qyzmetten keıin: Qarmet kokstyq batareıalardy túbegeıli jańartýǵa kiristi
QARAǴANDY. KAZINFORM — Qarmet kompanııasy № 8–9 jańa kokstyq batareıalaryn turǵyzýdyń sheshýshi kezeńine ótti: metallýrgııalyq kombınattyń qurylys alańynda bolashaq fýndamenttiń alǵashqy betony quıylyp, nysannyń naqty qurylysy resmı bastaldy. Bul — Qazaqstandaǵy eń iri kokstyq agregattardy salý jobasynyń jańa belesi.
Alǵashqy betonnyń qabyldanýy jobalaý jáne daıyndyq kezeńinen negizgi tehnologııalyq keshenderdi salýǵa túbegeıli kóshkenin bildiredi. № 8 jáne № 9 batareıalar kásiporyndaǵy eń ozyq, eń qýatty ári eń ekologııalyq tıimdi agregattar bolmaq. Jyldyq ónimdiligi — 1,5 mln tonna qurǵaq koks. Bul domna óndirisin uzaq merzimdi ári turaqty qamtamasyz etip, kombınattyń óndiristik turaqtylyǵyn aıtarlyqtaı arttyrady.
Jańa qurylys kásiporynnyń damý tarıhynda jańa paraq ashady. 1960 jyldary iske qosylǵan, 65 jyldan astam ýaqyt úzdiksiz jumys istegen № 1–4 batareıalardyń resýrsy tolyq sarqylǵan soń kezeń-kezeńimen toqtatylyp, paıdalanýdan shyǵarylmaq. Olardyń ornyna keletin zamanaýı agregattar ekologııalyq júktemeni azaıtyp, óndiris shyǵyndaryn tómendetedi, al qyzmetkerler úshin qaýipsizdigi joǵary, avtomattandyrylǵan jańa jumys ortasyn qalyptastyrady.
— Biz № 8 kokstyq batareıasynyń fýndamenttik plıtasyn quıýdy bastadyq, alǵashqy beton sátti qabyldandy. Bul — jobanyń tabysty júzege asatynyna senim beretin mańyzdy kezeń. Alda qomaqty qurylys jumystary tur, jáne bizdiń komanda ony belgilengen merzimde tolyq oryndaýǵa daıyn, — dedi Qarmet kompanııasynyń kapıtalyq qurylys jónindegi dırektory Alekseı Sıdorenko.
Qurylys jumystary Qarmet kompanııasy men koksohımııalyq ınjınırıng salasynda álemdik jetekshi sanalǵan ACRE Coking & Refractory Engineering Consulting Co arasyndaǵy bas merdigerlik kelisim aıasynda júrgizilip jatyr. ACRE — Qytaı metallýrgııalyq naryǵynda 95%-dan astam úleske ıe iri memlekettik ınjınırıng qurylymy. Kompanııa álem boıynsha myńnan astam ınjenerlik jáne konsaltıngtik jobany júzege asyrǵan, onyń 130-dan astamy bas merdiger retinde oryndalǵan.
Jobanyń jalpy ınvestıtsııalyq quny shamamen 369 mln AQSh dollar. Qarajat koksohımııalyq ınfraqurylymnyń tolyq tsıklin, ınjenerlik jeliler men barlyq qosalqy júıeni salýǵa baǵyttalyp otyr. Temirtaý metallýrgteri jańa agregattardan alǵashqy koksty 2027 jyly almaq.
№ 8–9 batareıalaryn turǵyzý — Qarmet kompanııasynyń keń aýqymdy jańǵyrtý strategııasynyń negizgi quramdas bóligi. Baǵdarlama metallýrgııalyq jáne taý-ken óndiristerin jańartýdy, óndiristik nysandardy qaıta jańǵyrtýdy, tehnıkalyq ınfraqurylymdy jańasha deńgeıge kóterýdi qamtıdy. Bul ózgerister kombınatta júrip jatqan qaıta jańǵyrtý kezeńiniń tereńdigi men mańyzyn aıqyn ańǵartady.