65 jyl taksı qyzmetin kórsetip kelgen 83 jastaǵy qarııa birde bir ret jol erejesin buzbaǵan
QARAǴANDY. KAZINFORM - Qaraǵandy oblysynyń Qarqaraly aýdanynda 83 jastaǵy taksıst aqsaqal turady. Tileýqor Qanapııaulynyń kózi 100 paıyz kóredi. Joldaǵy shuryq tesikti alystan ańǵarady. Taksı qyzmetin kórsetken 65 jylda birde bir ret jol erejesin buzyp kórmepti.
Qarqaraly aýmaǵynda Tileýqor atany tanymaıtyn adam kemde kem. Kóliginiń ishi jyly, jolaýshy úshin jaıly. Qajet deseńiz jandy daýysta án de shyrqap beredi.
«Eger men úıde otyrsam, aýyryp qalamyn. Keıin kóligime baryp, rólge otyrǵanda birden energııa men kóńil-kúı paıda bolady. Maǵan osylaı jeńil. Balalarym osy kúnge deıin jolda júrip keldiń, endi demal dep aıtady. Biraq bul isimdi qaldyra almaımyn»,- deıdi Tileýqor Qanapııauly.
Onyń kún tártibi tyǵyz. Qarqaraly qalasy men Nurken aýyly arasynda kúnde júredi. Qajet bolsa, Qaraǵandy, Ulytaý oblystary boıynsha jolaýshyny dittegen jerine jetkizedi.
«Óte senimdi kólik. Qaıda barsam da Tileýqor atany shaqyrtamyn. Sebebi, eshqashan jolda qaldyryp kórgen joq. Kóligi kúıli. Jol boıy áńgimelesip, tarıhty aıtyp, aýyldyń problemalaryn da qozǵap qoıamyz», - deıdi aýyl turǵyny Qaıdar Tóleýtaev.
Kólikti alǵash 18 jasynda tizgindegen. Sodan beri 65 jyl boıy taksıst bolyp eńbek etip keledi. Osy kásiptiń arqasynda otbasyn asyrady, balalaryn oqytyp, úılendirdi.
«Osylaı taksı júrgizip júrip, aqsha jınap 9 kólik satyp aldym. Ózime jáne balalaryma bir-birden kólik mingizdim. Bul meniń osy jumysymnyń arqasynda. Ulyma páter satyp alý úshin 5 myń dollar jınap berdim. Meniń jumysymda eń bastysy – qaýipsizdik. Eger adam uıyqtamasa, bul apatqa ákelýi múmkin. Eger jol erejelerin saqtap júrseń, eshqandaı qıyndyqqa tap bolmaısyń. Men munyń tiri mysalymyn», - deıdi Tileýkór Qanapııauly.
Tileýqor atanyń kóliginiń jaǵdaıy únemi baqylaýynda. Aqaý tabylyp jatsa lezde jóndep alady. Ol jol erejesin buzyp kórmegen taksıst. Jolǵa shyqpas buryn 8 saǵat tynyǵyp alady. Bul onyń basty prıntsıpi. Qarııa jaıaý júrýdi daǵdyǵa aınaldyrǵan. Qaqaǵan aıazdyń ózinde taza aýada 3 shaqyrym júredi. Bul kóbinese taksısterge paıdaly, deıdi zeınetker. Tańǵy jattyǵý da kún tártibinen túspeıdi.
«Eger kúndelikti jattyǵý jasamasam, osy 83 jasymda osyndaı tyń bolyp júrmes edim. Bos ýaqytym bola qalsa, jattyǵý jasaımyn. Kúnde tańerteń jáne keshke ýaqytymdy sportqa arnaımyn. Taý jaqqa baryp júrip keletinim de bar. Taksı júrgizýshilerin salaýatty ómir saltyn ustanýǵa shaqyramyn», - deıdi Tileýqor Qanapııauly.
Qarııanyń batanyń qolma qol sýyryp shyǵaratyn erekshe talanty da bar. Ár sózin yntymaq, bereke jaqsylyqqa baǵyttaıdy. Tileýqor Qanapııauly 8 bala tárbıelep, ósirgen. 32 nemere men 23 shóbereniń atasy. Qazir Aqoshqy bólimshesinede turatyn shóberelerin Nurken aýylyndaǵy mektepke tasymaldap, alańsyz bilim alýyna jaǵdaı jasap júr.
Osyǵan deıin Túrkistanda 74 jastaǵy qarııa 45 kelilik bóreneni kóterip, dúıim jurtty tańǵaldyrǵany jaıly jazǵan edik.