65 jastan asqan júrgizýshilerge qatysty talap: qaı dárigerler qaraıdy, aıyppul bar ma
ASTANA. KAZINFORM — Elimizde 65 jastan asqan júrgizýshilerge qatysty medıtsınalyq tekserý máselesi qyzý talqylanyp jatyr. Keıbir azamattar muny jańa talap dep qabyldap, júrgizýshi kýáliginen aıyrylyp qalamyz ba degen alańdaýshylyq bildirdi. Osyǵan baılanysty Іshki ister mınıstrligi men Densaýlyq saqtaý mınıstrligi resmı túsindirme berip, qoldanystaǵy tártipti túsindirdi.
Qazaqstanda 65 jastan asqan júrgizýshilerdiń medıtsınalyq tekserýden ótý mindeti 2014 jyldan beri qoldanysta.
Tek 25 shildeden bastap bir ǵana ózgeris kúshine engen.
— Eger júrgizýshi belgilengen merzimde medıtsınalyq tekserýden ótpese, onyń júrgizýshi kýáliginiń kúshi avtomatty túrde ýaqytsha toqtatylady. Medıtsınalyq tekserýden ótkennen keıin kýáliktiń kúshi eshqandaı qosymsha rásimsiz avtomatty túrde qaıta qalpyna keledi, — dedi ІІM resmı ókili.
Medıtsınalyq tekserýden qashan ótý qajet?
Resmı málimetke sáıkes, 65 jasqa tolǵan azamattar birden medıtsınalyq tekserýden ótýge mindetti emes.
Alǵashqy mindetti tekserýden azamat 67 jasqa tolǵanǵa deıin ótýge tıis. Osydan keıin beriletin medıtsınalyq anyqtamanyń jaramdylyq merzimi eki jyl.
Demek kelesi tekserý 69 jasta, keıin 71 jasta jáne ári qaraı ár eki jyl saıyn júrgiziledi.
Sondyqtan qazir ǵana 65 jasqa tolǵan azamattarǵa emhanalarǵa jappaı baryp, kezekke turýdyń qajeti joq.
Medıtsınalyq tekserýdi qaıdan ótýge bolady?
ІІM málimetinshe, júrgizýshiler medıtsınalyq tekserýden ózine yńǵaıly medıtsınalyq uıymda óte alady.
Atap aıtqanda memlekettik emhana, jekemenshik medıtsınalyq uıym men turǵylyqty jeri boıynsha nemese basqa qalada ótýine bolady.
Basty talap — medıtsınalyq uıymnyń osyndaı tekserýdi júrgizýge ruqsaty bolýy.
Al eger azamat medıtsınalyq tekserýden belgilengen ýaqytta ótpese, júrgizýshi kýáliginiń kúshi ýaqytsha toqtatylady.
Alaıda bul azamattyń júrgizýshi kýáliginen tolyqtaı aıyrylǵanyn bildirmeıdi. Medıtsınalyq anyqtamany alǵannan keıin júrgizýshi kýáligi avtomatty túrde qaıta jaramdy bolady.
Sonymen birge polıtsııa qyzmetkerlerine júrgizýshilerge eń aldymen jańa tártipti túsindirip, aýyzsha eskertý jasaý tapsyrylǵan. Eger adam talap týraly bilmegen nemese merzimdi ótkizip alǵan bolsa, oǵan aldymen medıtsınalyq tekserýden ótý múmkindigi beriledi.
Aıyppul qarastyrylǵan ba?
Mınıstrlik málimetinshe, medıtsınalyq tekserýden ótpegeni úshin zańnamada arnaıy aıyppul kózdelmegen.
Mundaı jaǵdaıda qoldanylatyn jalǵyz shara — medıtsınalyq tekserýden ótkenge deıin júrgizýshi kýáliginiń kúshin ýaqytsha toqtatý.
Sonymen qatar ІІM keı jaǵdaıda medıtsınalyq uıymnyń aqparattyq júıeden málimet jiberýi keshigýi múmkin ekenin aıtty.
Osyndaı jaǵdaıda júrgizýshi polıtsııa qyzmetkerine qaǵaz túrindegi medıtsınalyq anyqtamany kórsetse jetkilikti. Odan keıin qajetti aqparattyń bazaǵa engizilýin polıtsııa qyzmetkerleri qamtamasyz etedi.
Qandaı dárigerlerge barý kerek?
Densaýlyq saqtaý mınıstrliginiń málimetinshe, júrgizýshiler medıtsınalyq tekserýden ótken kezde myna mamandardyń qaraýynan ótedi:
jalpy praktıka dárigeri nemese ýchaskelik terapevt;
psıhıatr;
oftalmolog;
otorınolarıngolog
Atalǵan mamandar júrgizýshilerdi tekserý úshin qurylatyn arnaıy dárigerlik komıssııanyń quramyna kiredi. Olar júrgizýshiniń kólik quralyn basqarýǵa kedergi keltiretin medıtsınalyq qarsy kórsetilimderdiń bar-joǵyn anyqtaıdy.
Sondaı-aq medıtsınalyq tekserý barysynda bıologııalyq ortalardan psıhoaktıvti zattardy anyqtaýǵa arnalǵan zertteý júrgiziledi.
Al psıhıkalyq densaýlyq uıymynda esepte turǵan nemese aǵzasynda psıhoaktıvti zattardyń almasý ónimderi anyqtalǵan jaǵdaıda azamattardy kólik basqarýǵa jiberý máselesin dárigerlik-konsýltatsııalyq komıssııa qaraıdy.
Qajet bolǵan jaǵdaıda mundaı azamattarǵa qaıta medıtsınalyq tekserýden ótetin merzim belgilenedi. Qaıta medıtsınalyq tekserý merzimi keminde bir jyldan keıin ǵana júrgiziledi.
Sonymen qatar komıssııa múshelerinde azamattyń densaýlyq jaǵdaıyna qatysty kúmán týyndasa, ony qosymsha tekserýge nemese beıindi mamandardyń konsýltatsııasyna jiberýge bolady.
Kólik júrgizýge jaramdylyǵy týraly qorytyndy negizgi jáne qosymsha tekserýlerdiń nátıjesine súıene otyryp shyǵarylady.
Medıtsınalyq tekserý aqyly ma?
Densaýlyq saqtaý mınıstrligi júrgizýshige beriletin № 073/ý anyqtamasy tegin medıtsınalyq kómektiń kepildik berilgen kólemine de, mindetti áleýmettik medıtsınalyq saqtandyrý paketine de kirmeıtinin málimdedi.
Sondyqtan bul memlekettik qyzmet aqyly.
Qyzmet qunyn Densaýlyq saqtaý mınıstrligi belgilemeıdi. Baǵa óńirge jáne medıtsınalyq uıymǵa baılanysty ártúrli bolýy múmkin.
Komıssııa sheshimimen kelispegen jaǵdaıda ne isteýge bolady?
Eger azamat medıtsınalyq komıssııanyń sheshimimen kelispese, memlekettik qyzmet kórsetýshiniń basshysynyń atyna shaǵym túsire alady.
«Memlekettik kórsetiletin qyzmetter týraly» zańǵa sáıkes, mundaı shaǵym bes jumys kúni ishinde qaralady.
