65 jastan asqan júrgizýshiler eki jyl saıyn medıtsınalyq tekserýden ótedi
ASTANA. KAZINFORM – 25 tamyzdan bastap 65 jastan asqan júrgizýshiler men múgedektigi bar júrgizýshiler úshin mindetti medıtsınalyq tekserý engiziledi. Osy sanattaǵy azamattar endi eki jylda bir ret dárigerlik tekserýden ótýge mindetti. Bul týraly Óńirlik kommýnıkatsııalar qyzmetinde ótken brıfıngte Astana qalasy Polıtsııa departamenti Ákimshilik polıtsııa basqarmasynyń bastyǵy, polıtsııa polkovnıgi Nurlan Ývaev aıtty.
Onyń sózinshe, jańa talap jol qozǵalysy qaýipsizdigin kúsheıtýge jáne júrgizýshiniń densaýlyq jaǵdaıyna baılanysty bolýy múmkin jol-kólik oqıǵalarynyń aldyn alýǵa baǵyttalǵan.
– 2026 jylǵy 25 tamyzdan bastap 65 jastan asqan júrgizýshiler men múgedektigi bar júrgizýshiler eki jylda bir ret mindetti medıtsınalyq tekserýden ótedi. Medıtsınalyq tekserýden ótkeni týraly málimet Densaýlyq saqtaý mınıstrligi men Іshki ister mınıstrliginiń aqparattyq júıeleri arasynda avtomatty túrde almasady, – dedi Nurlan Ývaev.
Onyń aıtýynsha, júrgizýshi belgilengen merzimde medıtsınalyq tekserýden ótpese nemese dárigerler kólik basqarýǵa kedergi keltiretin medıtsınalyq qarsy kórsetilim anyqtasa, onyń kólik quralyn basqarý quqyǵy toqtatylady.
Jańa tártip boıynsha júrgizýshilerden qaǵaz túrindegi medıtsınalyq anyqtama talap etilmeıdi. Medıtsınalyq tekserýden ótkeni týraly aqparat memlekettik organdardyń aqparattyq júıeleri arqyly avtomatty túrde tekseriledi.
– Engizilip jatqan ózgeristerdiń negizgi maqsaty – aıyppul sanyn kóbeıtý emes, joldaǵy qaýipsizdikti kúsheıtý, jol-kólik oqıǵalarynyń aldyn alý jáne azamattardyń ómiri men densaýlyǵyn qorǵaý, – dedi ol.
Aıta keteıik, Astanada jol erejesin 87 ret buzǵan júrgizýshi qamaýǵa alynǵan edi.
