65 jastan asqan almatylyqtardy tumaýǵa qarsy ekpe alyp, oqshaýlanýǵa shaqyrdy

ALMATY. QazAqparat - Almaty qalasynyń Óńirlik kommýnıkatsııalar qyzmetiniń alańyndaǵy onlaın-brıfıng barysynda Joǵary medıtsınalyq kolledjdiń dırektory Svetlana Sultanǵazıeva dezınfektsııa júrgizýdiń mańyzdylyǵy men aldyn alý sharalarynyń mańyzdylyǵy týraly aıtty, dep habarlaıdy QazAqparat tilshisi.

Jalpyǵa ortaq oryndardyń qaýipsizdigin qamtamasyz etý maqsatynda Almatyda kireberister, balalar alańdary men aýla aýmaqtaryna aptasyna úsh ret dezınfektsııa júrgizý qyzmetine qaıta kiristi.

«Barlyq uıymdarda pandemııa bastalǵannan keıin dezınfektsııalyq tonnelder qoıyldy. Biz ony saýda, oıyn-saýyq ortalyqtarynan kórip júrmiz, kóptegen nysandarda sanıtaızerler, kvarts shamdary ornatylǵan, olar tek qoǵamdyq oryndarda ǵana emes, sonymen birge qoǵamdyq kólikterde de bar. Osynyń bári karantın jaǵdaıynda kerek. Sondaı-aq, biz kireberister, balalar alańdary men kóshede dezınfektsııalyq jumystardyń júrgizilýin quptaımyz, sebebi epıdemııalyq jaǵdaıǵa baılanysty ol jumystardyń mańyzy zor», - dedi ol.

Sonymen birge, Svetlana Sultanǵazıeva koronavırýstyń aldyn alýdyń negizgi sharalary týraly eske saldy jáne turǵyndardy sanıtarlyq-epıdemııalyq talaptardy saqtaýǵa shaqyrdy.

«Biz koronavırýs ınfektsııasyn juqtyrýdyń negizgi joly aýa tamshylary arqyly ekenin bilemiz. Sol sebepti qoǵamdyq oryndarda, kólikte betperde taǵyp, áleýmettik qashyqtyqty saqtaý – osynyń bári aldyn alý tásili bolyp tabylady. Naýqas adam túshkiredi, jóteledi, sonyń esebinen ol ınfektsııany basqalarǵa taratady. Birinshi kezekte, qaýip tobynda ımmýnıteti tómen adamdar, ıaǵnı, qarttar, balalar, basqa da aýrýlary bar jáne aýyr dertpen esepke alynǵan naýqastar bar», - dedi maman.

Onyń aıtýynsha, koronavırýspen naýqastanǵandardyń 30 paıyzy qart adamdar. Osyǵan baılanysty ol 65 jastan asqan adamdardy tumaýǵa qarsy ekpe alýǵa, oqshaýlaný rejımin saqtap, koronavırýstyń aldyn alýdyń barlyq sharalaryn saqtaýǵa shaqyrdy.