6,5 trln teńge qaıda jumsalady: Toqaev «Halyqtyq qurylys» týraly aıtty

Memleket basshysynyń aıtýynsha, Metallýrgııa kombınatynyń jetistikteri elimizdegi aýqymdy ózgeristermen tyǵyz baılanysty. Qazaqstan damýdyń jańa tarıhı kezeńine qadam basty. Alaıda qol jetkizgen tabysqa toqmeıilsýge bolmaıdy. Aldymyzda atqaratyn sharýa kóp.

— Elimizdiń saıası júıesiniń berik qurylymy qalyptasty. Bul reformalar, eń aldymen, memleket irgesin nyǵaıtý maqsatynda jasalyp jatyr. Álemdik saıasat pen ekonomıkada múldem jańa, áli keńirek zerdelenip úlgermegen jaǵdaıattar paıda bolǵan kezeńde munyń mańyzy óte zor. Qazaqstan paıdasymen qosa kemshiligi, tipti tirshilikke qater de tóndiretin Jasandy ıntellekt ústemdik quratyn jańa álemge oıdaǵydaı beıimdelý úshin tyńǵylyqty daıyndalýǵa tıis, — dedi Qasym-Jomart Toqaev.

Prezıdent elimiz tarıhymyzda buryn-sońdy bolmaǵan qarqyndy qurylysqa kirisip, búkil azamattyq ınfraqurylym jańǵyratynyn jetkizdi. 

— Kelesi jyldy «Jalpyhalyqtyq aýqymdy qurylys jyly» dep jarııaladym. Osy orasan jumysqa «Halyqtyq qurylys» degen ataý berildi. Joldaýda atap ótkenimdeı, atalǵan ǵalamat jobaǵa shamamen 6,5 trıllıon teńge bólinedi. Bul — oryndy sheshim. Óıtkeni «Halyqtyq qurylys» aıasynda el-jurtymyz barynsha muqtaj bop otyrǵan jobalar iske asyrylady. Eń mańyzdysy, «Halyqtyq qurylys» tutas eldi, barlyq qala men aýdandy qamtıdy. Shyn máninde, biz baıandy bolashaqtyń senimdi irgetasyn qalap jatyrmyz. Óıtkeni jańa ári jóndelgen joldardy, áýejaılardy, vokzaldardy, elektr stantsııalaryn, aýrýhanalardy, emhanalardy, mektepterdi, erekshe balalardy ońaltý ortalyqtaryn, balalar men jasóspirimderge arnalǵan shyǵarmashylyq úılerin, sport nysandaryn, bir sózben aıtqanda, barlyq azamattyq ınfraqurylymdy birneshe býyn paıdalanyp, ıgiligin kóredi. Jalpy, «Halyqtyq qurylystyń» búkil mán-maǵynasyn «Qurylys jáne taǵy da qurylys» degen bir aýyz sózben túsindirýge bolady. Túptep kelgende, búgingi jáne keleshek urpaqqa baǵdarlamalar men tujyrymdardy emes (biraq, bul da óte mańyzdy), biz olarǵa materıaldyq qundylyqtardy, eń aldymen, áleýmettik ınfraqurylym nysandaryn amanat etip qaldyrýymyz kerek. Halqymyzdyń áldeqaıda jaıly ómir súrýge, qazirgi órkenıetti zamannyń barlyq ıgiligin kórýge haqy bar. Ádiletti Qazaqstandy qurý strategııasynyń basty maqsaty da — osy, — dedi Memleket basshysy.