65 oqýshy «Abaı oqýlary» respýblıkalyq baıqaýynyń júldegeri atandy

ASTANA. KAZINFORM – 8–11 synyp oqýshylary arasynda ótken XXVI respýblıkalyq «Abaı oqýlary» shyǵarmashylyq baıqaýy aıaqtaldy. Bıylǵy baıqaý halyqaralyq mártebe alyp, uly oıshyl ári aqyn Abaı Qunanbaevtyń 180 jyldyǵyna arnaldy. Bul týraly Oqý-aǵartý mınıstrligi málim etti. 

Vedomstvonyń málimetinshe, baıqaý bes nomınatsııa boıynsha ótken. Alǵashqy kezeńge 1300-den astam oqýshy qatyssa, olardyń tek 112-si fınalǵa ótti, onyń ishinde 39-y aýyl mektepteriniń oqýshylary. Sonymen qatar Altaı ólkesi, Ózbekstan, Mońǵolııa, Qytaı jáne Túrikmenstan elderinen 20 halyqaralyq qatysýshy baq synady.

Baıqaý nátıjesi boıynsha 65 oqýshy júldeger atandy:

I dárejeli dıplom men altyn medal — 15 oqýshyǵa;

II dárejeli dıplom — 20 oqýshyǵa;

III dárejeli dıplom — 30 oqýshyǵa berildi.

Qosymsha 20 oqýshyǵa Qurmet gramotasy tabystaldy. Barlyq qatysýshylarǵa sertıfıkattar berildi.

Halyqaralyq qatysýshylar arasynan da jeńimpazdar anyqtalyp, arnaıy syılyqtar tabystaldy:

1. Búrkitbaev Saıaq — Ózbekstan

2. Baıdóletova Aınur — Túrikmenstan

3. Aıdos Nurmaǵanbet — Mońǵolııa

4. Úsenbaeva Araılym — Ózbekstan

Sondaı-aq, Mańǵystaý oblysynan Aıberikuly Almaz «Abaı» jýrnalynyń arnaıy júldesin ıelendi.

Abaı oqýlaryn QR Oqý-aǵartý mınıstrliginiń «Daryn» respýblıkalyq ǵylymı-praktıkalyq ortalyǵy jáne Abaı oblysynyń bilim basqarmasy uıymdastyryp otyr.

Eske sala keteıik, buǵan deıin Beıjińde 8-shi ret «Abaı oqýlary» ótkenin jazǵan edik.