6,5 mlrd teńge: Aqtóbede 35 myń kórermen syıatyn stadıon boı kóteredi

Memleket basshysy Qasym-Jomart Toqaevtyń 2025 jyly Ulttyq quryltaıdyń tórtinshi otyrysynda bergen elimiz boıynsha fýtboldy damytý jáne óńirlerde sporttyq ınfraqurylymdy jańǵyrtý jónindegi tapsyrmasyn oryndaý sheńberinde Qazaqstan Respýblıkasynyń Úkimeti rezervten Aqtóbede jańa fýtbol stadıonyn salýǵa 6,5 mlrd teńge bóldi.

 — Syıymdylyǵy 35 myń kórermenge deıin jetetin jańa zamanaýı stadıon qalanyń batys bóliginde, aýdany 25 gektar bolatyn aýmaqta salynyp jatyr. Keshen óńirdegi eń iri sport ınfraqurylymy nysandarynyń birine aınalmaq, onda jas sportshylar daıarlanatyn bolady. Stadıon ÝEFA-nyń 4-deńgeıiniń talaptaryna sáıkes jobalanǵan, onda jalpy aýdany 80 myń sharshy metrden asatyn bes qabatty sport ǵımaratynyń qurylysy salynbaq. Nysanda fýtbol alańy men kórermender trıbýnalarynan basqa komandalar men buqaralyq aqparat quraldarynyń ókilderine arnalǵan ınfraqurylym bolmaq, — delingen habarlamada.

Jobany úsh kezeńde júzege asyrý josparlanyp otyr. Úkimet bólgen 6,5 mlrd teńge bıyl bastalǵan birinshi kezeńge baǵyttalatyn bolady. Nysan qurylysy 2028 jyldyń qyrkúıeginde aıaqtalyp, paıdalanýǵa berilmek.

Aqtóbeniń buǵan deıingi bar ortalyq stadıony 1975 jyly salynǵan jáne shamamen 13 myń kórermenge eseptelgen. Dese de, «Aqtóbe» FK-niń óz alańynda ótkizetin matchtaryna degen jankúıerlerdiń qyzyǵýshylyǵy kúnnen-kúnge artyp keledi: oıyndardy kórgisi keletinder sany keıde arenanyń kóleminen úsh ese asyp ketip jatady. Sondyqtan jańa stadıonnyń qurylysy qalanyń naqty qajettiliginen týyndap otyr, óıtkeni onyń sporttyq ómirinde fýtbol oıyny burynnan-aq mańyzy zor. 

Jańa arena kelýshilerdi kóbirek qabyldaýǵa, halyqaralyq deńgeıdegi matchtardy, sondaı-aq iri sporttyq, mádenı jáne qoǵamdyq is-sharalardy ótkizýge múmkindik beredi. 

Budan buryn Shymkentte jańa stadıonnyń qurylysyna qatysty áleýmettik jelide aıtylǵan synı pikirlerge qala ákimdigi túsinik berdi.