65 mln teńgeniń dızel otynyn urlaǵan: Atyraýda 19 adam sottaldy
Atyraý qalasynyń №2 sotynda 19 adamnan turatyn uıymdasqan top músheleri men olarǵa kómekteskenderge qatysty qylmystyq is qaraldy. Aıyptalýshylarǵa uıymdasqan topty qurý, sol sııaqty oǵan basshylyq etý (QR Qylmystyq kodeksiniń 262-baby 1,2-bóligi), qylmystyq toppen asa iri mólsherde urlyq jasaý (188-baby 4-bóliginiń 1,3-tarmaǵy) deregimen qylmystyq is qozǵalǵan.
«Uıymdasqan top músheleri jáne olarǵa kómekteskender 2020 jyldyń 1 qańtarynan 1 jeltoqsan aralyǵynda «Q-L» JShS-ǵa jóndeýge kelgen Maqat lokomotıv paıdalaný deposyna tıeseli teplovozdardan 397 tonna dızel otynyn urlap, mekemege 84 061 528 teńge múliktik zalal keltirgeni týraly aıyp taǵyldy. Al sot anyqtaǵandaı, 311 tonna dızel otyny urlanyp, mekemege 65 854 646 teńge múliktik zalal keltirilgen. Sottalýshylardyń kinási ózderiniń, kýálardyń, aýdıtor men sarapshylardyń jaýaptarymen jáne saraptama qorytyndylarymen dálelin tapty», - dep habarlady №2 sottyń baspasóz qyzmetinen.
Prokýror sottalýshylarǵa 6 jyldan 8 jylǵa deıingi merzimge bas bostandyǵynan aıyrý jazasyn taǵaıyndaýdy surasa, jábirlenýshiniń ókili keltirilgen zııandy óndirýdi talap etti. Sottalýshylar taǵylǵan aıypty ishinara moıyndap, qorǵaýshylar qylmys quramynyń bolmaýyna baılanysty sottalýshylardy aqtaýdy surady.
Sot jaza taǵaıyndaý kezinde jazany jeńildetetin mán-jaılar retinde sottalýshylardyń buryn sotty bolmaǵanyn, asyraýynda jas balalarynyń baryn eskerdi. Jazany aýyrlatatyn mán-jaılar anyqtalmaǵan.
«Sot úkimimen uıymdasqan top músheleri I.R., S.M., Á.Q., T.D., S.S., S.A., T.B., B.G., Q.A., A.A., Ú.Q., E.K., A.J. kórsetilgen baptarmen kináli dep tanylyp, olarǵa 2 jyldan 7 jyl aralyǵynda bas bostandyǵynan aıyrý jazasy taǵaıyndaldy.
Al uıymdasqan topqa kómektesken dep aıyptalǵan S.A., J.A. áreketteri QR Qylmystyq kodeksiniń 371-babynyń 2-bóligimen (salǵyrttyq) saralanyp, bas bostandyǵynan shekteý jazasy taǵaıyndaldy.
Sonymen qatar uıymdasqan topqa kómektesken dep aıyptalǵan Sh.N., Ý.B., A.J., Q.M. áreketteri 196-baptyń 3-bóligi 1,2-tarmaqtarymen (Kórineý qylmystyq jolmen tabylǵan múlikti ıemdený) saralanyp, bas bostandyǵyn shekteý jazasy taǵaıyndaldy», - dep málim etti sottyń baspasóz qyzmetinen.
Sot úkimi zańdy kúshine engen joq.