65 ferma iske qosylsa elde óndiriletin sút kólemi artady - Serik Jumanǵarın
Premer-Mınıstrdiń orynbasary Serik Jumanǵarınniń tóraǵalyǵymen ótken keńeste Qazaqstanda taýarly sút fermalaryn salý jónindegi Úlken jobanyń iske asyrylý barysy talqylandy, dep habarlaıdy Kazinform Úkimettiń resmı saıtyna silteme jasap.
Bıyl elimizde 65 taýarly sút fermasy jumysyn bastaýy kerek. Olardyń arasynda jańa jáne óndiris qýatyn arttyrýdy kózdep otyrǵan taýarly sút fermalary bar. Kásiporyndardyń barlyǵy ınvestıtsııalyq jobalar pýlyna kirdi, ol óz kezeginde 10 jyl merzimge 2,5% jeńildikpen qaryz alý múmkindigin beredi.
Eske sala keteıik, 2023 jyly Memleket osy maqsattarǵa 100 mlrd teńge bóldi.
Keńeste aýyl sharýashylyǵy vıtse-mınıstri Erbol Tasjúrekov habarlaǵandaı, áleýeti bar jobalar pýlyn qalyptastyrý jumystary ótken jylǵy sáýir aıynda bastalǵan bolatyn. Barlyq qajetti qujattar qabyldanǵannan keıin Úlken jobaǵa qatysýshy 11 óńirge ÁKK arqyly jobalardy jeńildikpen nesıeleý úshin qarajat baǵyttaldy.
100 mlrd teńge kólemindegi kelesi transh 2024 jyly bolady dep kútiledi. Memleket aýyl sharýashylyǵy jerlerin sýarý, qus fabrıkasyn, kókónis jáne jemis qoımalaryn salý, sondaı-aq et óndirýge mamandanǵan mal sharýashylyǵy jobalaryn qarjylandyratyn bolady.
Vıtse-premer Serik Jumanǵarın Úlken jobaǵa qatysýshy barlyq óńir ókilderin tyńdady. Kásiporyndar pýlyn anyqtaý jáne qarjylandyrý boıynsha kedergilerdi joıý máseleleri egjeı-tegjeıli talqylandy.
«2024 jyly paıdalanýǵa berý josparlanyp otyrǵan birde-bir jobany 2025 jylǵa qaldyrýǵa bolmaıdy. Úlken jobaǵa bólingen memleket qarajaty birinshi kezekte elimizde taýarly sút óndirisin aıtarlyqtaı ulǵaıtý úshin 65 fermany iske qosýdy kózdeıdi. Árbir jobany arnaıy komıssııa tekseredi. Sút fermalaryn salý – Úlken jobanyń bir bóligi ǵana, basqa da óndirister pýlyn ázirlep bastaý qajet. Óńirlerge aqpan aıynyń sońyna deıin barlyq joba boıynsha sheshim qabyldaýdy tapsyramyn», — dedi vıtse-premer.
