65 el BUU-nyń kıberqylmysqa qarsy konventsııasyna qol qoıdy

ASTANA. KAZINFORM – Vetnamnyń Hanoı qalasynda kıberqylmystyń aldyn alý jáne oǵan qarsy is-qımyl jónindegi alǵashqy halyqaralyq konventsııa qol qoıýǵa ashyldy. Alǵashqy kúni oǵan 65 memleket qol qoıdy. Bul týraly BUU jańalyqtary habarlady.

Qujat ár eldiń ulttyq rásimderine sáıkes ratıfıkatsııalanýy qajet.

— Kıberqylmysqa qarsy BUU konventsııasy bul kıberqylmysqa qarsy bizdiń birlesken qorǵanysymyzdy nyǵaıtýǵa baǵyttalǵan qýatty ári zańdy kúshi bar qural. Bul sheshim izdeýdegi kópjaqty tásildiń ómirsheńdigin dáleldeıtin qujat jáne damý deńgeıine qaramastan, birde-bir el kıberqylmys aldynda qorǵansyz qalmaıtynyna berilgen ýáde, — dedi BUU Bas hatshysy Antonıý Gýterrısh qol qoıý rásiminde.

Konventsııanyń maqsaty — aqparattyq-kommýnıkatsııalyq tehnologııalardy teris paıdalaný arqyly jasalatyn terrorızm, adam saýdasy, qarjy alaıaqtyǵy jáne esirtki kontrabandasy sııaqty qylmystarǵa qarsy áreket etý.

Qujat kıberqylmystyń aldyn alý sharalarynyń tıimdiligin arttyrýdy, halyqaralyq yntymaqtastyqty kúsheıtýdi jáne ásirese damýshy elderdiń áleýetin nyǵaıtýdy kózdeıdi.

Konventsııanyń negizgi baptary mynalardy qamtıdy:

Barlyq aýyr qylmys boıynsha elektrondyq dálelderdi jınaý, almasý jáne paıdalaný úshin alǵashqy jahandyq tetik qurý (buǵan deıin mundaı halyqaralyq standarttar bolmaǵan);

Kıberqylmystarǵa, ınternettegi alaıaqtyqqa, balalardy onlaın qylmystyq áreketterge tartýǵa jáne seksýaldyq qanaýǵa qatysty quqyq buzýǵa qylmystyq jaýapkershilik engizý;

Alǵash ret halyqaralyq quqyqta ıntımdik beınelerdi ruqsatsyz taratý qylmys retinde tanyldy;

Memleketter arasyndaǵy jedel áreket etý úshin táýlik boıy jumys isteıtin alǵashqy jahandyq jeli qurý;

Kıberqylmystardy tıimdi tergeý úshin elderdiń múmkindikterin damytý qajettiligin moıyndaý.

— Kıberqylmys uıymdasqan qylmystyń tabıǵatyn túbegeıli ózgertti, al jańa BUU konventsııasy memleketterge bul qaýipke tıimdi qarsy turýǵa múmkindik beretin mańyzdy qural bolady. Endi bizdiń mindetimiz — Konventsııanyń tezirek kúshine enýin qamtamasyz etý, — dedi BUU Esirtki jáne qylmys jónindegi basqarmasynyń (UNODC) atqarýshy dırektory Gada Valı.

Kıberqylmysqa qarsy BUU konventsııasyn Bas Assambleıa 2024 jylǵy jeltoqsanda qabyldaǵan. Qujat 40 memleket ratıfıkatsııalaǵannan keıin 90 kún ótken soń kúshine enedi.

Aıta ketelik Qazaqstan BUU-nyń kıberqylmysqa qarsy konventsııasyna qosylmaq.