6,5 ball: Meksıkadaǵy jer silkinisi prezıdent baspasóz máslıhatyn toqtatty

ASTANA. KAZINFORM — Prezıdent Klaýdııa Sheınbaým jýrnalıster suraǵyna jaýap berip jatqan sátte magnıtýdasy 6,5 balǵa jetken jer silkinisi boldy. Terbelis zaldy shaıqap, jer silkinisi týraly eskertý júıesi iske qosylǵan kezde ǵana baryp baspasóz máslıhatyn toqtatty. Bul týraly VVS jazdy.

Jer silkinisi juma kúni tańerteń Meksıkanyń Gerrero shtatynda bolyp, Sheınbaýmnyń bıylǵy jylǵy alǵashqy baspasóz konferentsııasyn úzip jiberdi.

Meksıkanyń seısmıkalyq eskertý júıesiniń dabylyn estigen keıbir turǵyndar úılerinen kóshege atyp shyqty. Bul júıe el aýmaǵy boıynsha 1985 jylǵy joıqyn jer silkinisinen keıin engizilgen eken, sol apat saldarynan keminde 5 000 adam qaza tapqan.

Beınejazbalarda Mehıko qalasyndaǵy ǵımarattardyń shaıqalyp, al Gerrero shtatynyń Akapýlko qalasynda kólikterdiń dirildegeni kórinedi.

Meksıkanyń ulttyq seısmologııalyq agenttiginiń málimetinshe, jerasty dúmpýi jergilikti ýaqyt boıynsha tańǵy saǵat 7:58-de, 35 shaqyrym tereńdikte tirkelgen. Epıtsentr shamamen 673 myń adam turatyn iri kýrorttyq qala Akapýlkodan 65 shaqyrym jerde jáne San-Markos qalasynan 15 shaqyrym qashyqtyqta ornalasqan.

Zardap shekkender men qandaı da bir ǵımarattardyń qıraýy týraly ázirge habar joq.

Epıtsentrden júzdegen shaqyrym alysta jatqan Mehıko qalasynda da qıraýlar týraly habar túsken joq, alaıda kóptegen turǵyndar úreılenip úıden syrtqa júgirip shyqqan, kóshelerde ıtterdiń úrgen daýysy estilgen.

Aıta ketsek, Gerrero shtatynda, onyń ishinde týrıster úshin asa tanymal Akapýlko qalasynda áli kúnge deıin 2023 jyly óńirge úlken soqqy bergen besinshi sanattaǵy joıqyn daýyldan keıingi qalpyna keltirý jumystary jalǵastyrylyp jatyr.

Eske sala ketsek, buǵan deıin Meksıkada poıyz apatynan 13 adam qaza taýyp, 98 adam jaraqat aldy. 

Al 22 kúni Almaty turǵyndaryna túnde jer silkinisi sezildi.