645 mln dollarlyq joba: Qazaqstanda jańa jel elektr stantsııasy boı kóteredi
ASTANA. KAZINFORM — Óńirlik ekologııalyq sammıt aıasynda Energetıka mınıstrligi men «Karaganda Wind Power» kompanııasy arasynda 500 MVt jel elektr stantsııasyn salý jóninde ınvestıtsııalyq kelisim jasaldy. Qujatqa Energetıka mınıstri Erlan Aqkenjenov pen «Karaganda Wind Power» JShS basqarma tóraǵasy Shao ıÝebo qol qoıdy. Bul týraly Energetıka mınıstrligi málim etti.
Qaraǵandy oblysyndaǵy 500 MVt qýattaǵy jel elektr stantsııasy memleketaralyq kelisim aıasynda júzege asyrylyp otyr jáne Qazaqstandaǵy jańartylatyn energııa kózderin damytý jónindegi aýqymdy baǵdarlamanyń bir bóligi.
— Jobaǵa 645 mln AQSh dollary kóleminde ınvestıtsııa salynady. Stantsııa jyl saıyn shamamen 1,6 mlrd kVt·saǵ «jasyl» elektr energııasyn óndiredi dep kútiledi. Jobany iske asyrý jyl saıyn shamamen 1,3 mln tonna kómirqyshqyl gazynyń shyǵarylýyn azaıtýǵa múmkindik berip, eleýli ekologııalyq áser beredi, — delingen habarlamada.
Joba eldiń energetıkalyq qaýipsizdigin arttyrýǵa, «jasyl» ekonomıkany damytýǵa jáne energetıka salasyna sheteldik ınvestıtsııalar tartýǵa baǵyttalǵan.
Eske sala keteıik, Óńirlik ekologııalyq sammıtte Memleket basshysy 2030 jylǵa qaraı elektr qýatynyń 15 paıyzyn jańartylatyn energııa kózderinen alatynymyzdy aıtty. Elimiz iri energetıkalyq nysandardan aýaǵa taraıtyn zııandy shyǵaryndylardy 35 paıyzǵa azaıtýdy kózdeıdi.
