6400 adam júrgizýshi kýáligin onlaın qyzmetpen aldy

ASTANA. QazAqparat - Qazaqstanda onlaın tártipte júrgizýshi kýáligin aýystyrý júıesi iske qosylǵaly beri atalmysh qyzmetti 6400 adam paıdalanǵan. Bul týraly «Azamattarǵa arnalǵan úkimet» memlekettik korporatsııasynyń tóraǵasy Abylaıhan Ospanov Feısbýk paraqshasynda jazdy, dep habarlaıdy QazAqparat tilshisi.

«Men buǵan deıin júrgizýshi kýáligin onlaın rejımde aýystyrýǵa bolatynyn aıtqan edim. Aıtpaqshy, meniń ózim de jaqynda atalmysh qyzmetti paıdalanyp, fotosýretim men qoltańbamdy telefonǵa túsirip, ótinimmen birge joldadym. Siz osy arqyly ózińizdiń 2 saǵatyńyzdy únemdeı alasyz. Bizde osyǵan deıin 6400 adam júrgizýshi kýáligin onlaın túrde alǵan. Onyń ústine, Áset Turysov («Ulttyq aqparattyq tehnologııalar» AQ basqarma tóraǵasy - avt.) jańa dızaındy tańdaýǵa bolatynyn jarııa etti», - dedi áleýmettik jelidegi paraqshasynda Abylaıhan Ospanov.

«Azamattarǵa arnalǵan úkimet» memlekettik korporatsııasynyń tóraǵasy osy jazba arqyly júrgizýshi kýáligin qalaı onlaın aýystyrýǵa bolatyny túsindirilgen shaǵyn vıdeomen bólisti.


Eske sala ketsek, biz buǵan deıin úıden shyqpaı júrgizýshi kýáligin qalaı jańartýǵa bolatynyn jazǵan bolatynbyz. Elektrondy úkimet portaly (egov.kz) arqyly onlaın tártipte júrgizýshi kýáligin qalaı aýystyrý kerektigin mamyrda «Azamattarǵa arnalǵan úkimet» memlekettik korporatsııasynyń qoǵammen baılanys departamentiniń dırektory Murat Jumanbaı óziniń Feısbýk paraqshasynda jarııalady.