64 jastaǵy keıýana 73 jetim balany asyrap ósirgen
ASTANA. QazAqparat - Reseıdiń Dondaǵy Rostov qalasynda turatyn 64 jastaǵy Tatıana Vasılevna Sorokına óziniń uly men qyzyna qosa, balalar úıinen jáne qaraýsyz qalǵan 73 balany asyrap, baǵyp-qaǵyp ósirgen. Bul týraly keshe reseılik «Birinshi arnanyń» «Mýjskoe-Jenskoe» telejobasynda kórsetildi.
Reseıdegi jetim balalardyń otbasylyq balalar úılerinde tárbıelenýine belgili balalar jazýshysy, qoǵam qaıratkeri, Reseı balalar qorynyń tóraǵasy, akademık Albert Anatolevıch Lıhanov muryndyq bolǵan eken. 1988 jyly onyń bastamasymen elde 578 otbasylyq balalar úıi ashylyp, 5 myńǵa tarta jetim balalar otbasylarynda analardyń meıirim-shýaǵyna bólengen.
Osy bastamaǵa alǵashqylardyń biri bolyp ún qatqan altyn júrekti ana Tatıana Vasılevna kúıeýi Mıhaıl Sorokın ekeýi osy jyly alǵashqy 5 jetim balany qamqorlyǵyna alǵan. Búginde osynaý úlken shańyraqta tatý-tátti ómir súrip, japyraq jaıǵan 73 balanyń birazy azamat bolyp, at jalyn tartyp, úılengen, oqý bitirgen, jumysqa ornalasqan. Olardyń arasynda múgedek jandar da az bolmaǵan, olar ana meıirimi men shýaǵynyń arqasynda salaýatty azamattar sanatyna qosylǵan. Olardyń ózinen baqytty ana 25 nemere súıip otyr.
Bir qyzyǵy, osy otbasynda tárbıelengen balalardyń birde-biri qylmysqa urynbaǵan, salaýatty azamat bolyp ósip-ónip, jaqsy tárbıe alǵan.
Tatıananyń ózinen týǵan qyzy Anna da búginde 10 bala ósirip otyr, olardyń da kópshiligi jetim balalar. Al sińlisi osyndaı 32 bala tárbıelep otyr.
Tatıana úshin esh balanyń bótendigi joq. Úlken shańyraqtyń osynaý úlgisine habarǵa qatysqandardyń tańdanysy zor boldy. Jaqynda ǵana kúıeýin jer qoınyna tapsyrǵan abzal ana budan bylaı da qamqorlyqqa muqtaj jandardy qanatynyń astyna alyp, solar úshin ómir súrmek.
