637 medal! Qazaqstan Azııa oıyndaryndaǵy eń myqty quramalar qatarynda
ASTANA. KAZINFORM — Japonııada ótetin HH jazǵy Azııa oıyndarynyń bastalýyna sanaýly kún qaldy. Osy oraıda Kazinform tilshisi Qazaqstan quramasy sary qurlyqtyń basty dodasyndaǵy jetistikterine kóz júgirtip kórdi.
Qazaqstan Azııa oıyndaryna 1994 jyldan bastap qatysyp keledi. 1994-2022 jyl aralyǵynda el sportshylary 8 jazǵy Azıadada óner kórsetip, barlyǵy 637 medal (165 altyn, 180 kúmis jáne 292 qola) ıelendi. Osylaısha, el quramasy Azııa oıyndary tarıhynda eń kóp júlde jeńip alǵan komandalar qatarynan kórindi (6-oryn). Qytaı 3 570 júlde ıelenip, kósh bastady. Japonııa (3 242 medal) jáne Ońtústik Koreıa (2 425 medal) úzdik úshtikti túıindedi.
Qazirgi ýaqytta Qytaı altyn júlde sany boıynsha alda kele jatyr, qorjyndarynda 1 674 altyn medal bar. Al Japonııa quramasy 1 084 altyn medalmen ekinshi orynǵa jaıǵasty. Sonymen qatar japonııalyq sportshylar kúmis medal sany boıynsha qytaılyqtardan tek 1 júlde artta.
Qazaqstan quramasy jalpy komandalyq esepte eń joǵary kórsetkish retinde 4-oryndy tórt ret (1994, 2002, 2006, 2014) ıelengen. Sportshylarymyz eń kóp altyn medaldy 2014 jyly Inchhon Azııa oıyndarynda jeńip alsa, 2006 jylǵy Dohada eń kóp medal (85 medal) enshiledi.
Sondaı-aq, qazaqstandyq sportshylar 2022 jylǵy Hanchjoý Azııa oıyndarynda eń tómen nátıje kersetti. Ulttyq qurama 80 júlde enshilegenimen, tek 10 altyn medal jeńip aldy. Osylaısha, Qazaqstan komandalyq esepte 11-orynnan kórindi.
Eske salaıyq, HX jazǵy Azııa oıyndary 2026 jyldyń 19 qyrkúıek pen 4 qazan aralyǵynda Japonııanyń Aıchı prefektýrasy men Nagoıa qalasynda ótedi, oıyndardyń urany — Imagine One Asia («Birtutas Azııany elestet»).
Osyǵan deıin habarlaǵanymyzdaı, baıraqty básekede Qazaqstan ulttyq quramasynyń sapynan 558 sportshy baq synaıdy.
