63 jastaǵy Óskemen turǵyny esirtki saýdalaǵany úshin 10 jylǵa sottaldy

ÓSKEMEN. QazAqparat – 2021 jylǵy jeltoqsanda Óskemen-1 stantsııasynda Jelilik polıtsııa qyzmetkerleri esirtkini zańsyz saqtaý jáne ótkizý kúdigi boıynsha Óskemen qalasynyń buryn sottalǵan 63 jastaǵy turǵynyn ustady.

Bul týraly QazAqparat Kóliktegi polıtsııa departamentiniń baspasóz qyzmetine silteme jasap habarlaıdy.

Quqyq buzýshynyń jumys ornyn, turǵylyqty jerin jáne tizgindegen avtokóligin tintý kezinde jalpy salmaǵy 9 keliden asatyn oraýly kúıde asa iri mólsherdegi «keptirilgen marıhýana» esirtkisi tárkilendi.

Atalǵan fakti boıynsha kólik polıtseıleri QR QK 297-baby (Esirtki zattaryn asa iri mólsherde ótkizý maqsatynda zańsyz saqtaý jáne tasymaldaý) boıynsha sotqa deıingi tergeý júrgizdi.

Bıylǵy jyldyń 12 mamyrynda ShQO qylmystyq ister jónindegi aýdanaralyq mamandandyrylǵan sotynyń úkimimen quqyq buzýshy qasaqana asa aýyr qylmys jasaǵany úshin kináli dep tanylyp, 10 jylǵa bas bostandyǵynan aıyryldy.

Eske sala keteıik, jyl basynan beri elimizdiń kólik polıtseıleri esirtki quraldarynyń zańsyz aınalymyna baılanysty 155 esirtki qylmysyn anyqtady, onyń 15-i – ótkizý, 8-i – asa iri kólemde saqtaý faktileri.

Zańsyz aınalymnan 28 keliden astam túrli esirtki quraldary tárkilendi.