63 myń JRVI jaǵdaıy: Qaraǵandy oblysynda respıratorlyq vırýstardyń belsendi taralýy baıqaldy
QARAǴANDY. KAZINFORM — Qaraǵandy oblysynda maýsymdyq juqpaly aýrýlar ósim kórsetip, syrqattanǵandardyń basym bóligin balalar qurap otyr. Dárigerler tumaý men ózge de respıratorlyq vırýstardyń belsendi aınalymyna alańdaýshylyq bildirip, vaktsınatsııanyń mańyzyn qaıta eske saldy.
Balalar arasyndaǵy syrqattyń artýy jáne maýsymdyq tumaýdyń taralýy
Oblystyq sanıtarııalyq-epıdemıologııalyq baqylaý departamentiniń málimetinshe, 1 qazan men 13 qarasha aralyǵynda 63 251 JRVI jaǵdaıy anyqtaldy. Juqtyrǵandardyń 56%-y — 14 jasqa deıingi balalar. Zerthanalyq tekserýler de balalar arasyndaǵy syrqattanýshylyq deńgeıiniń joǵary ekenin rastap otyr.
Óńirde tumaýdyń A (H3N2) tıpindegi 35 jaǵdaıy tirkeldi. Bul — jyl saıyn kúz-qys maýsymynda keń taralatyn dástúrli vırýstyq qosalqy túr. Aýyrǵandardyń 83%-yn balalar quraıdy, olardyń bári vaktsına almaǵan.
Dárigerler vırýstyń jańa shtamm emestigin, al onyń sımptomdary klassıkalyq tumaýǵa tán belgilermen tolyq sáıkes keletinin atap ótedi: dene qyzýynyń kúrt kóterilýi, bas pen bulshyqetterdiń aýyrýy, qaltyraý jáne álsizdik.
Óńirde taralǵan basqa vırýstar
Epıdemıologtar bıyl tumaýdan ózge respıratorlyq ınfektsııalardyń da qarqyndy aınalymyn tirkep otyr.
Tumaýǵa jatpaıtyn ınfektsııalarǵa zerttelgen 389 úlginiń 59%-y oń nátıje bergen. Eń jıi anyqtalǵan vırýstar:
- rınovırýs — 40%,
- paragrıpp — 19%,
- bokovırýs — 11%,
- adenovırýs — 8%,
- respıratorlyq sıntsıtıaldy vırýs — 1,2%,
- budan bólek, ózge de respıratorlyq qozdyrǵyshtar kezdesedi.
DDSU-nyń boljamyna sáıkes, bıylǵy maýsymda A (H1N1), A (H3N2) jáne B shtammdary basym bolady. Bul shtammdardyń barlyǵy qazirgi vaktsınalardyń quramyna engizilgen, sondyqtan ekpe aýrýdyń aýyr asqynýlarynyń aldyn alýǵa múmkindik beredi.
Mektepterdegi monıtorıng jáne aldyn alý sharalary
Bilim berý uıymdarynda oqýshylar men pedagogterdiń qatysýy jáne densaýlyq jaǵdaıy kún saıyn baqylaýda. Bir synyptaǵy syrqattanýshylyq deńgeıi 10%-dan aspaıdy, sondyqtan mektepterdi jappaı qashyqtan oqytý formatyna kóshirý josparda joq.
Mektepterde, medıtsınalyq uıymdarda jáne balalar mekemelerinde súzgiler jumys isteıdi: JRVI nemese tumaý belgileri baıqalǵan adamdar úıine nemese dárigerge jiberiledi.
Qazirgi tańda oblysta 143 686 adam vaktsına alǵan. Bul — oblys halqynyń 12%-y. Vaktsınatsııalaý naýqany jalǵasyp jatyr.
Ózińizdi jáne balalaryńyzdy qorǵaý joldary: sanıtarlyq qyzmettiń usynymdary
Sanıtarııalyq qyzmet mamandary tıimdi profılaktıkalyq sharalardy ustanýǵa keńes beredi:
- adamdar kóp jınalatyn, ásirese jabyq oryndarǵa barýdy shekteý;
- aýrý belgileri bar adamdarmen baılanysty azaıtý;
- qol gıgıenasyn saqtaý — qoldy jıi jáne muqııat jýý, antıseptık paıdalaný;
- úı-jaılardy turaqty jeldetip, ylǵaldy tazalaý júrgizý;
- S dárýmenine baı taǵamdardy tutyný;
- alǵashqy belgiler baıqalsa, ózin-ózi emdeýden bas tartyp, dárigerge júginý.
Mamandardyń aıtýynsha, ýaqytyly vaktsınatsııa men qarapaıym saqtyq sharalary respıratorlyq ınfektsııalar maýsymynda densaýlyqty qorǵaýdyń eń senimdi tásilderiniń biri bolyp qala beredi.
Osyǵan deıin QR Densaýlyq saqtaý mınıstrliginiń resmı ókili Ásel Qydyrálıeva elimizde jańa tumaý shtamy tarap jatqan joq jáne epıdemıologııalyq jaǵdaı turaqty dep málimdegen bolatyn.