622 myńnan astam adam ataýly áleýmettik kómek aldy

NUR-SULTAN. QazAqparat - 2022 jylǵy 1 tamyzdaǵy jaǵdaı boıynsha 121,1 myń otbasyndaǵy 622,6 myń adamǵa ataýly áleýmettik kómek (AÁK) taǵaıyndaldy. Bıyl osy maqsattarǵa bıýdjetten 83,8 mlrd teńge bólindi, dep habarlaıdy QazAqparat.

«AÁK otbasynyń árbir múshesine jan basyna shaqqandaǵy ortasha tabysy óńirlik eń tómengi kúnkóris deńgeıiniń 70%-ynan tómen azamattarǵa taǵaıyndalady. Budan basqa, elimizdiń barlyq óńirinde tabysy az otbasylardyń mektep jasyna deıingi balalaryn kepildik berilgen áleýmettik toptamamen qamtamasyz etý boıynsha jumys júrgizilip jatyr», - delingen Eńbek jáne halyqty áleýmettik qorǵaý mınıstrligi málimetinde.

Vedomstvo málimetinshe, 2022 jylǵy 1 tamyzdaǵy jaǵdaı boıynsha AÁK alýshylar qataryndaǵy 1 jastan 6 jasqa deıingi 169,5 myń balaǵa azyq-túlik jáne turmystyq hımııa jıyntyǵy túrinde áleýmettik toptama berildi.

Qazirgi ýaqytta qazaqstandyqtar AÁK taǵaıyndaýǵa ótinishti turǵylyqty jeri boıynsha jumyspen qamtý ortalyǵynda, sondaı-aq egov.kz elektrondy úkimet portaly arqyly bere alady.