62 jastaǵy qyzylordalyq áıel kólik dóńgelegin jóndep júr
QYZYLORDA. KAZINFORM – Qyzylorda oblysy Shıeli aýdanynyń ortalyǵynda 15 jyldan beri kólik dóńgelegin jóndeýmen aınalysyp júrgen áıel turady.
62 jastaǵy Nurjamal Omarova bul kásipke oılamaǵan jerden kelgen. Ol satýshy mamandyǵy boıynsha oqý bitirgenimen turmysqa shyqqasyn 16 jyl boıy aýdandyq mádenıet úıinde tazalyqshy bolǵan.
Joldasy Sabyrhan Aqanov 1993 jyly aýdanda alǵashqylardyń biri bolyp kólik jóndeý ortalyǵyn ashqan. Biraq on shaqty jyldan keıin densaýlyǵy syr berip, kásipten qol úzýge týra keledi. Nurjamal apa otbasylyq kásipti orta joldan tastaýǵa qımaıdy.
– Buryn kúıeýim jumys istep jatqanda dóńgelekti qalaı jóndeıtinin kóretinmin. Ol aýyryp qalǵanda úırengenimdi jetildirip, kásipti ary qaraı jalǵastyrýǵa bel býdym. Áýelgide ballonǵa jel berý úshin 10 teńge alatynbyz. Qazir 50 teńgege kóterildi. Odan bólek kólik akkýmýlıatoryn tekserip, qýattaımyn. Dóńgelegin teńgerip, jel beremin, jamaımyn. Kómegime júginýshiler sany ár kezde árqalaı. Ortalyqqa kelýshiler qarasy, ásirese, kóktem men kúzde kóbeıedi, - deıdi keıipkerimiz.
«Bir ózińizge dóńgelekti alyp, salý qıyn emes pe?» degen suraǵymyzǵa Nurjamal apa «ońaı jerde nan joq» dep qysqa qaıyrdy. Ol kisiden jumystyń qyr-syryn úırenip, óz aldyna kólik jóndeý ortalyǵyn ashqan jastar bar.
– Kelýshilerden kóbine jaǵymdy pikir estımin. Jumysty adal atqarýǵa tyrysamyn. Ózime senimdi bolǵan kúnde de úılerine aman-esen jetip alýyn tilep, ýaıymdap otyramyn. Kólik júrgizýshiler qystyń sýyǵynda, jazdyń ystyǵynda jolda qalyp qoımasa deımin, - dedi mehanık áıel.
Erge bergisiz eńbek etip júrgen keıipkerimiz 5 baladan 14 nemere súıip otyr. Bir qyzyǵy, Nurjamal Omarova kólik jóndeýdi bilgenimen ózi kólik júrgize almaıdy eken.
Eske sala keteıik, buǵan deıin Ulttyq statıstıka bıýrosy bıyl aqpanda elimizde 149,2 myń avtokólik quraly esepke qoıylǵanyn málimdegen bolatyn.