62 tom jınalǵan: Sherzat isine qatysty qylmysty tergeý aıaqtaldy

QONAEV. KAZINFORM - Almaty oblysynyń polıtsııa departamenti kámeletke tolmaǵan balany óltirý faktisi boıynsha qylmysty tergeý aıaqtalǵanyn habarlady. 

Taraptar qylmystyq is materıaldarymen tolyq tanysyp, is sotqa jiberý úshin prokýrorǵa joldanǵan. 

Polıtsııa málimetinshe, tergeý barysynda 40 sot saraptamasy júrgizilip, shamamen 200 kýágerden jaýap alynǵan. Barlyq kúdiktiniń oqıǵa ornynda aıtqan jaýaptary tekserildi, protsess qatysýshylary arasynda bettestirýler ótkizildi.

— Qylmysqa qatysýshylardyń barlyǵyna quqyqtyq baǵa bere otyryp, 8 beınematerıal zertteldi. Qylmystyq is 62 tomnan turady, onyń ishinde barlyq jınalǵan dáleldeme, saraptama qorytyndysy, jaýap alý hattamasy jáne basqa da mańyzdy materıaldar bar, - dep habarlady departamentten. 

Oblystyq polıtsııa tergeýdiń barysy jáne protsess qatysýshylarynyń konstıtýtsııalyq quqyqtarynyń saqtalýy prokýratýra organdarynyń baqylaýynda bolǵanyn atap ótti.

Eske salaıyq, byltyr 4 qazan kúni tóbelesten 16 jasar jasópirim qaıtys bolǵanyn jazǵanbyz. 

Keıin ashýly talǵarlyqtar jasóspirim ólimine baılanysty narazylyqqa shyqty. 

2024 jyldyń 12 qazanynda qara jamylǵan otbasynyń úıi órtenip ketti. Almaty oblysynyń Polıtsııa departamenti bótenniń múlkin qasaqana joıý faktisi boıynsha is qozǵady. 

15 qazan kúni Talǵar qalasynyń ákimi Bahyt Qýatbekuly Kúrishbekov, Talǵar qalasy ákiminiń orynbasary Matan Saǵyndyq óz mindetterin tıisti deńgeıde atqarmaǵany úshin laýazymdarynan bosatyldy. Artynsha, Talǵar aýdany ákimi apparatynyń basshysy Aslan Qasymbaev qyzmetinen qýyldy. 

2024 jyldyń jeltoqsan aıynda Talǵar mańynda Sherzat Polattyń aǵasy óli tabyldy. 

Keıin Azat aýylynda jerleý rásimin ótkizý kezinde qoǵamdyq tártipti buzǵany úshin Sherzat Polattyń ákesi Qarjaýbaı ustalǵanyn jazǵanbyz.