62 mlrd teńge shyǵyn: Depýtat «Bolashaq oıyndaryn» keıinge qaldyrýdy usyndy
ASTANA. KAZINFORM – Májilis depýtaty Sergeı Ponomarev 2026 jyldyń shilde-tamyz aılaryna josparlanǵan halyqaralyq «Bolashaq oıyndaryn» keıinge shegerýdi usyndy. Bul usynysyn depýtat Premer-Mınıstr Oljas Bektenovke joldady.
Depýtat qazirgi kúrdeli ekonomıkalyq jaǵdaıda mundaı iri kólemdegi shyǵynnyń qanshalyqty oryndy bolatyny jóninde suraq qoıdy.
– Árbir bolashaq qazirgi berik irgetastyń ústinen salynady. Qazirgi ekonomıkalyq ahýalda 2026 jyly mundaı aýqymdy shyǵyndardyń oryndylyǵy kúmán týdyrady, – dedi dedi S. Ponomarev.
S. Ponomarev 2024 jyly respýblıkalyq bıýdjet 570 mlrd teńge kiris túspeı qalǵanyn, al «Bolashaq oıyndaryn» ótkizýge 62 mlrd teńgege deıin qarjy jumsalatynyn eske saldy.
– Bul qarajatqa alty zamanaýı mektep salýǵa bolar edi, – dep atap ótti depýtat.
Onyń pikirinshe, týrnırdi keıinge shegerý Qazaqstanǵa is-sharaǵa anaǵurlym jan-jaqty ári sapaly daıyndalýǵa múmkindik beredi.
Aıta keteıik, «Bolashaq oıyndary» – fızıkalyq sport túrleri men kıbersportty biriktiretin phygital (physical + digital) formatynda ótetin halyqaralyq mýltısporttyq týrnır. Alǵashqy týrnır 2024 jyly Qazan qalasynda ótken.
Bastapqyda jarys 2025 jyly Qazaqstanda ótedi dep josparlanǵan bolatyn. Alaıda, qarajatty sý tasqynynyń zardaptaryn joıý men zardap shekken azamattarǵa kómek kórsetýge qaıta bólý maqsatynda, týrnır 2026 jylǵa shegerilgen. Endi onyń ótkizilý merzimi taǵy da qaıta qaralýy múmkin.
Elimizde 1,5 mln-nan asa qazaqstandyq belsendi túrde kıbersportpen aınalysady.