62 mln teńge: Túrkistan oblysynda bilim uıymdaryna sharýashylyq taýarlary nege qymbatqa alynǵan
TÚRKІSTAN. KAZINFORM – Áleýmettik jelide Keles aýdandyq bilim bóliminiń 62,1 mln teńgege sharýashylyq taýarlaryn satyp alǵany týraly aqparat tarady. Jazba avtory taýarlardyń baǵasyna nazar aýdaryp, olardyń ne úshin qymbatqa alynǵanyn suraǵan.
Onda memlekettik satyp alý portalyndaǵy jalpy somasy 62 180 118 teńgeni quraıtyn shartqa qatysty suraqtar qoıylǵan. Avtor, atap aıtqanda, 850 dana 56 zattan turatyn kiltter jıyntyǵyna 12,9 mln teńge, 950 dana balǵaǵa 5,1 mln teńge, 450 dana baltaǵa 3,2 mln teńge jáne 950 dana shelekke 3 mln teńgeden astam qarajat qarastyrylǵanyn atap ótken.
Avtor taýarlardyń naryqtyq baǵamen sáıkestigin, olardyń naqty qaı bilim berý uıymdaryna bólingenin jáne jetkizilgenin rastaıtyn qujattardyń bar-joǵyn suraǵan.
Osyǵan baılanysty Keles aýdanynyń bilim bólimi túsinik berdi.
Vedomstvonyń málimetinshe, 2026 jylǵy 28 mamyrda jalpy somasy 57 637 500 teńgege ashyq konkýrs ótkizý týraly ótinim joldanǵan.
– 2026 jylǵy 23 maýsymdaǵy memlekettik satyp alý qorytyndysy boıynsha «Zavod Sılovyh Transformatorov «Kentaý» JShS 53 603 550 teńge kólemindegi usynysymen jeńimpaz dep tanylǵan. Merdigerdiń QQS tóleýshi ekenin eskere otyryp, taraptar arasynda jalpy somasy 62 180 118 teńgege memlekettik satyp alý týraly shart jasalǵan, – delingen Keles aýdanynyń bilim bóliminiń jaýabynda.
Resmı aqparatqa sáıkes, taýarlar 30 maýsymda júkqujat negizinde qabyldanyp, 1-10 shilde aralyǵynda Keles aýdandyq bilim bólimine qarasty bilim berý uıymdaryna tolyq jetkizilgen.
Keles aýdandyq bilim bólimi memlekettik satyp alý rásimi qoldanystaǵy zańnama talaptaryna sáıkes júrgizilgenin jáne merdiger uıymnyń taýarlardy jetkizý jónindegi mindettemelerin tolyq oryndaǵanyn habarlady.
Buǵan deıin Túrkistan oblysynda «Baton-2» balabaqshasyna 1,3 mlrd teńge bıýdjet qarajaty zańsyz aýdarylǵany týraly áleýmettik jelide taraǵan aqparatqa qatysty materıal jarııalaǵan edik. Bul aqparatqa oblystyq bilim basqarmasy túsinik bergen.
