62 myńnan astam adam qysqa merzimdi kásiptik oqýdan ótti
ASTANA. KAZINFORM — 2024 jyly 62,1 myń adam biliktiligin arttyrý jáne jańa mamandyqtardy ıgerý maqsatynda qysqa merzimdi kásiptik oqýdan ótti, dep habarlaıdy Eńbekmıni.
Qysqa merzimdi kásiptik oqytý jumyssyz azamattarǵa birneshe aı ishinde eńbek naryǵynda talap etiletin kásiptik bilim men daǵdylardy alýǵa múmkindik beredi.
Oqytý oqý uıymdarynda (kýrstar jumys berýshilerdiń suranysy boıynsha uıymdastyrylady), jumys berýshilerdiń jumys ornynda, sondaı-aq suranysqa ıe kásipter tizbesi boıynsha Skills Enbek qysqa merzimdi oqytý portalynda júrgiziledi.
Kásiptik oqytýdyń uzaqtyǵy biliktilik pen daǵdylardyń erekshelikterine qaraı 6 aıdan aspaıtyn merziámdi quraıdy.
— Óńirler bólinisinde oqýǵa jiberilgenderdiń eń kóp sany Aqtóbe — 11 myń adam, Qostanaı — 4,7 myń adam, Jambyl — 4,5 myń adam, Túrkistan oblystarynda — 4,1 myń adam jáne Almaty qalasynda — 4,3 myń adam baıqalady. 2024 jyly mansap ortalyqtary oqý uıymdarynda oqýǵa 7,8 myń adamdy jiberdi, onyń ishinde 6,7 myń adam oqýdy aıaqtady. Oqý aıaqtalǵannan keıin 5,9 myń adam jumysqa ornalastyryldy, — delingen Eńbek jáne halyqty áleýmettik qorǵaý mınıstrligi habarlamasynda.
Jumyssyzdardy jumys ornynda oqytý jumys berýshi tarapynan tájirıbeli qyzmetkerlerdiń ishinen bilikti tálimgerdi bekite otyryp, kásiporyndar men uıymdarda uıymdastyrylady. Oqý kezeńinde jumys berýshi men jumyssyz arasynda eńbek sharty jasalady. 20 AEK mólsherindegi jalaqyny eńbek mobıldiligi ortalyǵy bilim alýshynyń shotyna tikeleı jiberedi.
2024 jyly jumys oryndarynda 1 948 adam oqýdan ótti, onyń ishinde 1 769 adam oqýdy aıaqtady. Oqýdy aıaqtaǵannan keıin 1 481 adam nemese 83,7% jumysqa ornalasty.
2024 jyly 52,4 myń jumyssyz Skills Enbek portaly arqyly onlaın kýrstardan ótti.
Qysqa merzimdi oqytýdan ótkender arasynda eń suranysqa ıe mamandyqtar: tiginshi — 1 328 adam, aspaz — 1 090 adam, shashtaraz — 805 adam, kondıter — 409 adam, elektr-gazben dánekerleýshi — 289 adam boldy.
Esterińizge sala keteıik, qysqa merzimdi kásiptik oqýdan ótý úshin turǵylyqty jeri boıynsha Mansap ortalyǵyna, al aýyldyq jerlerde — kentterdiń, aýyldyq okrýgterdiń, aýdandyq mańyzy bar qalalardyń ákimderine júginý qajet.
Kásiptik oqýdan ótetin azamattar oqý aqysyn tóleý, stıpendııa ne jalaqy, jol júrý boıynsha memlekettik qoldaýmen qamtamasyz etiledi.
Turǵylyqty jerinen tys eldi mekende oqýdan ótý kezinde bilim alýshyǵa turýǵa materıaldyq kómek (turǵyn úı jaldaý boıynsha shyǵystardy óteý) kózdelgen.
Buǵan deıin habarlanǵandaı, Eńbekmıni 2031 jylǵa qaraı elimizde 1,6 mln kadr qajet ekenin málim etti.