+60…+70 °C-qa deıin qyzady: Elimizde jol qyzmeti kúsheıtilgen rejımde jumys istep jatyr
ASTANA.KAZINFORM - Aýa temperatýrasynyń kúrt kóterilýine baılanysty Qazaqstannyń jol qyzmetteri tsementbeton jabyny bar respýblıkalyq mańyzy bar avtomobıl joldaryn táýlik boıy baqylaýda ustap otyr.
QazAvtoJol 18 shildedegi jaǵdaı boıynsha jalpy uzyndyǵy 1 636,5 shaqyrym jol ýchaskesine turaqty monıtorıng júrgizilip jatqanyn málimdedi. Josparly tekserýler barysynda Jambyl, Pavlodar jáne Túrkistan oblystarynda tsementbeton jabynynyń jergilikti temperatýralyq deformatsııasy tirkelgen alty ýchaske der kezinde anyqtaldy.
Árbir ýchaskege jedel túrde jol brıgadalary men arnaıy tehnıka jumyldyryldy. Jóndeý-qalpyna keltirý jumystaryna barlyǵy 51 jol mamany jáne qajetti arnaıy tehnıka tartyldy. Turaqty patrýldeý men jedel áreket etýdiń nátıjesinde anyqtalǵan barlyq aqaý qysqa merzimde tolyq joıylyp, kólik qozǵalysynyń qaýipsizdigi tolyq qamtamasyz etildi.
Qazirgi ýaqytta jol qyzmetteri kúsheıtilgen rejımde jumys istep jatyr. Aptap ystyq kezinde tsementbeton jabynynyń betki temperatýrasy +60…+70 °C-qa, al keıbir ýchaskelerde odan da joǵary deńgeıge deıin qyzýy múmkin.
Mundaı jaǵdaıda beton plıtalarynda ishki kerneý paıda bolady. Bul – álemniń kóptegen elderinde aptap ystyq kezeńinde kezdesetin tabıǵı paıdalaný qubylysy. Sondyqtan jaz mezgilinde joldardyń tehnıkalyq jaı-kúıin úzdiksiz baqylaýǵa erekshe kóńil bólinedi.
Turaqty patrýldeý temperatýralyq deformatsııa qaýpi bar ýchaskelerdi erte kezeńde anyqtap, aldyn alý nemese qalpyna keltirý jumystaryn ýaqytyly júrgizýge múmkindik beredi. Bul óz kezeginde kúrdeli aqaýlardyń aldyn alyp, jol qozǵalysynyń qaýipsizdigin saqtaýǵa yqpal etedi.
Tsementbeton jabyny bar avtomobıl joldarynyń jaı-kúıine táýlik boıy monıtorıng júrgizý jalǵasyp jatyr. Barlyq jol qyzmeti respýblıkalyq mańyzy bar avtomobıl joldarynda qaýipsiz ári úzdiksiz qozǵalysty qamtamasyz etý úshin joǵary daıyndyq rejıminde jumys atqaryp jatyr.
Aıta keteıik, Túrkistan oblysynda kúnniń ystyǵynan bes ýchaskede joldyń beton jabyny kóterildi.
