600 tonna qorǵasyn men 100 tonna alıýmınıı quımalaryn shetel asyrmaq bolǵandar ustaldy

ASTANA. KAZINFORM - «Zań jáne tártip» qaǵıdatyn iske asyrý aıasynda Іshki ister mınıstrligi strategııalyq shıkizatty shetelge zańsyz shyǵarý boıynsha kóleńkeli shemalarǵa qarsy kúresip jatyr, — dep habarlaıdy Polisia.kz.

Qylmyskerler metaldardyń keıbir túrlerin eksporttaýǵa moratorıı jarııalanǵanyna qaramastan, olardy shekaradan kontrabandalyq jolmen shyǵarýǵa áreketter jasalyp jatyr. Qabyldanǵan sharalardyń nátıjesinde, Jetisý oblysy Polıtsııa departamentiniń Uıymdasqan qylmysqa qarsy kúres basqarmasy prokýratýramen birlesip, ruqsat qujattarynsyz jumys istegen kompanııanyń zańsyz qyzmetiniń jolyn kesti.

Atalǵan kompanııa tústi metaldardy zańsyz qabyldap, óńdeýdi uıymdastyryp, ilespe qujattarǵa jalǵan málimetter engizý arqyly olardy birneshe ret el aýmaǵynan tysqary shyǵarýǵa tyrysqan.

Kásiporyn aýmaǵynda júrgizilgen tintý sharalary barysynda shetelge jóneltýge daıyndalǵan 600 tonnadan astam qorǵasyn jáne 100 tonnadan astam alıýmınıı quımalary, sondaı-aq tústi metall synyǵy tárkilendi.

Metall balqytýǵa arnalǵan jasyryn tseh pen onyń quramyn aldyn ala zertteýge arnalǵan zerthana joıyldy. Budan bólek, nysan aýmaǵynda zańsyz eńbek etken, kóshi-qon zańnamasyn buzǵan sheteldik azamattar ustalyp, olar zańnamaǵa sáıkes jaýapqa tartyldy. Qazirgi ýaqytta sotqa deıingi tergep-tekserý júrgizilip, qylmystyq shemanyń túpki benefıtsıarlary anyqtalý ústinde.

Osyǵan deıin ІІM metall synyqtaryn kontrabandalyq jolmen tasymaldaý shemalaryn anyqtaǵany týraly jazdyq.