600 mlrd teńgelik zańsyz qumar oıyn shemasy boıynsha toǵyz adam qamaýǵa alyndy
ASTANA. KAZINFORM — Onlaın-kazınoǵa 600 mlrd teńge shyǵarǵan transshekaralyq shema áshkerelendi, dep habarlaıdy QMA baspasóz qyzmeti.
Qarjylyq monıtorıng agenttigi zańsyz oıyn bıznesin toqtatý boıynsha belsendi jumysty jalǵastyryp keledi. Qabyldanǵan sharalar nátıjesinde transshekaralyq aýdarymdardyń aýqymdy shemasy áshkerlendi. Onda aqsha tólem uıymdary arqyly ótkizilip, zańdy operatsııalar retinde jasyrynyp, onlaın-kazınonyń paıdasyna shyǵarylǵan.
Qazaqstan aýmaǵynda onlaın-kazıno qyzmetine tolyq tyıym salynǵan. Mundaı platformalar salyq tólemeıdi, klıentterdi sáıkestendirmeıdi, balalar men jastardy belsendi túrde tartady, sondaı-aq halyqtyń moraldyq jáne psıhıkalyq densaýlyǵyna eleýli zııan keltiredi.
Shemany júzege asyrý úshin fınteh-servısterdiń ıeleri býkmekerlik keńselermen jasalǵan jalǵan sharttar negizinde alynǵan «sur» POS-termınaldar men Terminal ID qoldanǵan. Qazir zańsyz operatsııalardyń anyqtalǵan kólemi 600 mlrd teńgeden asady.
Quqyqqa qarsy áreketke 20-dan astam tólem uıymy, sondaı-aq ekinshi deńgeıli bankterdiń jekelegen laýazymdy tulǵalary tartylǵan.
— Sonymen qatar tórt onlaın-kazınoǵa tehnıkalyq qoldaý kórsetip, aqsha operatsııalary boıynsha keńes bergen Call-ortalyqtyń qyzmeti toqtatyldy. Onyń zańsyz jumysyna Qazaqstan, Reseı, Belarýs, Ispanııa jáne Vetnam azamattarynan quralǵan 120 adam tartylǵan. Budan bólek, Call-ortalyq uıymdastyrýshylary krıptovalıýta arqyly qarajat qabyldap, shyǵarýdy júzege asyrǵan gemblıng negizindegi seriktestik baǵdarlamasyn qurǵan. Onyń aınalymy 200 mln USDT-ten asyp tústi, — delingen QMA habarlamasynda.
Atalǵan is-sharalardy júzege asyrý barysynda 70-ten astam tintý júrgizilip, zattaı dáleldemeler tárkilendi.
— Sot sanktsııasymen, olardyń ishinde «Tólem uıymdary qaýymdastyǵy» ZTB basshysynyń keńesshisi bar toǵyz tulǵaǵa qamaýǵa alý túrindegi bultartpaý sharasy qoldanyldy. Qazirgi ýaqytta olardyń ishinde shetel azamattary bar segiz adamdy halyqaralyq izdeýge jarııalaý úshin materıaldar daıyndalyp jatyr. QPK-niń 201-babyna sáıkes ózge aqparat jarııalaýǵa jatpaıdy, — delingen habarlamada.
Agenttik jeke jáne zańdy tulǵalardy zańsyz qumar oıyndardy ilgeriletýge qatysýǵa jol berilmeıtini jóninde taǵy da qatań eskertedi.
— Onlaın-kazıno qyzmeti zańdy buzyp qana qoımaı, lýdomanııanyń taralýyna sebep bolady. Osyǵan baılanysty zańsyz qumar oıyndarǵa kómek kórsetýge baǵyttalǵan kez kelgen áreket qylmystyq qyzmetti uıymdastyrýǵa járdemdesý retinde baǵalanyp, sózsiz qylmystyq jaýapkershilikke ákep soǵady, — delingen vedomstvo taratqan aqparatta.
Budan buryn onlaın-kazıno jarnamasyn shekteý jáne ónimderdi tsıfrlyq tańbalaý usynyldy.