600 myńynshy aqtóbelikti qala ákimi Azamat Beket quttyqtady
AQTÓBE.KAZINFORM - Aqtóbe qalasynyń halqynyń sany 600 myń turǵynǵa toldy. Mundaı resmı derekti búgin Qazaqstan Respýblıkasy Ulttyq statıstıka bıýrosynyń Aqtóbe oblysy boıynsha departamenti jarııalady.
Aqtóbeniń 600 myńynshy turǵyny — Mansur esimdi náreste. Ol qalamyzdyń 8-shi shaǵyn aýdanynda turatyn Qurmashevtar otbasynda dúnıege keldi. Qala ákimi Azamat Beket osy qýanyshty sátte jas otbasynyń shańyraǵyna syılyǵymen arnaıy baryp, aqjarma tilegin bildirdi.
Qurmashevtar áýleti — eńbekqor Aqtóbeniń naǵyz úlgisi. Otaǵasy Jasulan — telekommýnıkatsııa salasynyń mamany, al anasy Aısulý — jas dáriger. Kishkentaı Mansur — bul áýlettiń tuńǵyshy ári kóp jyl zaýytta eńbek etken Amangeldi Qurmashevtiń alǵashqy nemeresi.
Kezdesý óte jyly ári erekshe meıirli ótti. Náresteniń ájesi Alýash apaı izgi dástúrmen «yrym bolsyn» dep qala ákimine Mansurdyń ıtkóılegin syıǵa tartty. Bul — jaqsylyqtyń nyshany, qalamyzǵa bereke men yrys ákelsin degen aq tilek edi.
Qala ákimi Azamat Beket halyq sanynyń qarqyndy ósýi — Aqtóbeniń damýy men tartymdylyǵynyń basty kórsetkishi ekenin atap ótti.
— Qalamyz sońǵy jyldary tek san jaǵynan emes, aýqymy jaǵynan da edáýir ósti. Jańa úıler boı kóterip, ınfraqurylym jaqsaryp jatyr. Bizdiń basty maqsatymyz — árbir turǵynǵa jaıly orta qalyptastyrý. Árıne, biz úshin áleýmettik nysandardy salý — eń basty basymdyq, — dedi ákim.
Qala basshysynyń aıtýynsha, bala sanynyń artýyna baılanysty bilim berý salasyna erekshe kóńil bólinip otyr. Búginde Aqtóbede 121 mektep (onyń 8-i sońǵy birjarym jylda ashyldy) jáne 245 balabaqsha jumys istep tur. Jańa áleýmettik nysandardyń qurylysy aldaǵy ýaqytta da jalǵasa bermek.
Statıstıka departamentiniń basshysy Aıbek Ǵalymjanov 600-myńynshy turǵyndy anyqtaý úshin qatań demografııalyq ádistemege súıengenin túsindirdi.
— Biz týý, qaıtys bolý jáne kóshi-qon protsesterin saǵat saıyn qadaǵalap otyrdyq. Osy derekter negizinde qala halqynyń sany 600 myńǵa jetken sátte dúnıege kelgen náreste anyqtaldy, — dedi ol.
Qurmashevtar áýletin jáne barsha aqtóbelikti osy tarıhı sátpen quttyqtaımyz! Aqtóbemiz kórkeıe bersin, ár shańyraqta sábıdiń syńǵyrlaǵan kúlkisi estilsin!
