600-den astam otandyq kompanııa: Ulttyq ónim — 2026 kórmesi tarıhyndaǵy eń iri sharaǵa aınaldy
ASTANA. KAZINFORM — Elordada otandyq óndirýshilerdiń dástúrli ІH «ULTTYQ ÓNIM — 2026» kórmesi óz jumysyn bastady. Bıylǵy kórmeniń aýqymy eki esege ósti. Bul týraly Premer-mınıstrdiń orynbasary — Ulttyq ekonomıka mınıstri Serik Jumanǵarın málimdedi.
Ulttyq ekonomıka mınıstri bıylǵy kórmeniń basty ereksheligi men qatysýshylar belsendiligine toqtalyp ótti.
— Bıyl 9-ret uıymdastyrylyp otyrǵan Ulttyq ónim kórmesi jańa deńgeıge kóterilip, óz tarıhyndaǵy eń aýqymdy sharaǵa aınalyp otyr. Oǵan 600-den astam kompanııa qatysyp jatyr. Bul ótken jylmen salystyrǵanda shamamen eki ese kóp. Bul alań búginde ıgi dástúrge aınalyp, qazaqstandyq kásiptiń jetistigin aıqyn kórsetetin mańyzdy shara boldy. Munda tek taýarlardy ǵana emes, ár ónimniń artynda turǵan kásipkerlerdiń eńbegi, tabandylyǵy men talanty kórinedi, — dedi ol.
Vıtse-premerdiń aıtýynsha, memleket tarapynan jasalyp jatqan júıeli qoldaý sharalary otandyq óndirýshilerdiń damýyna tikeleı septigin tıgizip otyr. Búginde elimizdegi ekonomıkalyq belsendi halyqtyń aıtarlyqtaı bóligi dál osy kásipkerlik salasynda shoǵyrlanǵan.
— Úkimet kásipkerlerdiń alańsyz jumys istep, kásibin damytýyna barynsha jaǵdaı jasaý baǵytynda júıeli jumys júrgizip keledi. Atap aıtqanda qoljetimdi qarjylandyrýdy qamtamasyz etý, jańa naryqtarǵa shyǵýǵa qoldaý kórsetý, bıznesti damytýǵa baılanysty kedergilerdi azaıtý baǵytynda sharalar qabyldanyp jatyr. Bul jumystyń nátıjesi de aıqyn kórine bastady. Búginde elimizdegi ár besinshi adam kásipkerlik salasynda eńbek etedi. Shaǵyn jáne orta bıznestiń ekonomıkadaǵy úlesi 41 paıyzǵa jetse, bul salada jumyspen qamtylǵandar sany shamamen 4,5 mıllıon adam, — dedi ol.
Sonymen qatar mınıstr memlekettik qoldaýdyń naqty baǵdarlamalary men bólingen qarjynyń nátıjesi týraly da mańyzdy derekterdi alǵa tartty. Onyń ishinde «Damý» qory arqyly júzege asqan jobalar men ashylǵan jańa jumys oryndary el ekonomıkasynyń ósimine úlken serpin bergenin atap ótti.
— Úkimet 2025 jyly bıznesti qoldaý maqsatynda «Damý» qory arqyly 560 mıllıard teńgeden astam qarjy bóldi. Sonyń nátıjesinde jalpy nesıe kólemi 2,2 trıllıon teńge bolatyn13 myń shaǵyn jáne orta bıznes jobasy memlekettik qoldaý sharalarymen qamtyldy. Sonyń arqasynda 15 myńǵa jýyq jańa jumys orny ashylyp, óndirilgen ónim kólemi 27,7 trıllıon teńgege artty, al bıýdjetke túsken salyq kólemi shamamen 2 trıllıon teńge boldy, — dedi ol.
Aıta keteıik, buǵan deıin, bul kórmede úsh kún boıy eldiń barlyq óńirinen 350 óndirýshi qatysyp, óz ónimderin usynatynyn jazǵan edik.
