600-den astam qazaq Ózbekstannyń memlekettik nagradasyna ıe boldy

NUR-SULTAN. QazAqparat – 630 qandasymyz kórshi ózbek eliniń memlekettik nagradasyna ıe boldy. Bul týraly Ózbekstan Respýblıkasynyń Qazaqstandaǵy Tótenshe jáne Ókiletti elshisi Saıdıkram Nııazhodjaev málim etti, dep habarlaıdy QazAqparat tilshisi.

«Buǵan deıin aıtqanymdaı, bizdiń eldiń damýyna úlesin qosýshylar qatarynda qazaq baýyrlas halqy da bar. Osy oraıda 630 qazaq ulty ókili túrli sala boıynsha Ózbekstan memleketiniń memlekettik nagradasymen marapattaldy. Biz baýyrlas Qazaqstan elimen atalǵan baǵyttaǵy dostyq qarym-qatynasty jalǵastyra beretin bolamyz», - dedi Saıdıkram Nııazhodjaev elordadaǵy Ózbekstan elshiliginde ótken baspasóz máslıhatynda.

Elshiniń sózine sensek, búgingi tańda Ózbekstan elinde 800 myńnan astam qandasymyz turyp jatyr.

«Qazirgi tańda Ózbekstanda 822 myń qazaq ómir súrip jatyr. Olar Ózbekstan eliniń damýyna óz úlesin qosýda. Bizdiń elde 400-deı mektep qazaq tilinde bilim berip jatyr. Sonymen qatar, Ózbekstannyń 7 joǵary oqý ornynda gýmanıtarlyq jáne tehnıkalyq mamandyqtar qazaq tilinde úıretilip jatyr. 1992 jyldan beri Ózbekstannyń 30 oblys ortalyǵynda qazaq mádenı ortalyǵy jumys istep tur», - degentuǵyn elimizdegi ózbek elshisi.

Buǵan deıin, Saıdıkram Nııazhodjaev bıylǵy 6 aı ishinde Qazaqstan men Ózbekstan eli arasyndaǵy taýar aınalymy 1,9 mlrd AQSh dollarǵa jetkenin málim etti.

Sondaı-aq, Ózbekstan elshisi eki el aýmaǵynda birlesken farmatsevtıka ónerkásibin ashý josparlanyp jatqanyn aıtty.