600-den astam astanalyq ekologııalyq aktsııaǵa qatysady
ASTANA. QazAqparat - Erteń Memleket basshysynyń bastamasymen qurylǵan elordanyń «jasyl beldeýi» aýmaǵyn sanıtarlyq tazartý boıynsha ekologııalyq aktsııa ótedi. Shara Dúnıejúzilik qorshaǵan ortany qorǵaý kúni aıasynda uıymdastyrylady. Bul týraly astana.kz saıtyna Astana qalasynyń Іshki saıasat basqarmasynan habarlady.
Uıymdastyrýshylar sharaǵa 600-den astam adam qatysady dep josparlap otyr. Sonyń ishinde QR Qorshaǵan orta jáne sý resýrstary mınıstrliginiń, Astana qalasy Tabıǵı resýrstar jáne tabıǵat paıdalanýdy retteý basqarmasynyń, Astana qalasy boıynsha Ekologııa departamentiniń qyzmetkerleri, «Astana ormany» jáne «Astana Eko-Polıgon NS» JShS kommýnaldyq kásiporyndarynyń, «PosadiDerevoKZ» respýblıkalyq qoǵamdyq birlestiktiń ókilderi, sonymen qatar QR Ulttyq gvardııasynyń áskerı qyzmetkerleri, «Jas Otan» jastar qanatynyń músheleri, belsendi stýdentter men eriktiler qatysady.
Alash tas jolynyń boıyndaǵy aýmaqta zańsyz tastalǵan qoqys oryndary tazartylyp, joıylady. Uıymdastyrýshylar barlyq astanalyqtardy qalys qalmaı, qalamyzdy jınaýǵa baǵyttalǵan aktsııaǵa qatysýǵa shaqyrady. Shara 5 maýsymda saǵat 9.30 bastalady.
Aıta keteıik, 1972 jyly BUU Bas assambleıasy 5 maýsymdy Dúnıejúzilik qorshaǵan ortany qorǵaý kúni dep belgilep, bárin qorshaǵan ortany saqtaýǵa jáne jaqsartýǵa baǵyttalǵan sharalardy ótkizýge shaqyrdy.
